Як улады Мінска зразумеюць, у каго жывуць незарэгістраваныя сабакі? Разлік на неабыякавых суседзяў

Фактычна ў сталіцы стартуе эксперымент па легалізацыі хатніх гадаванцаў. Пра тое, як будзе працаваць гэты механізм і якім чынам стане вядома пра пражыванне жывёлы ў кватэры, піша sb.by.

Колькасць хатніх гадаванцаў у краіне не паддаецца ўліку. А павінна б: згодна з патрабаваннямі заканадаўства, каты і сабакі ў жылых памяшканнях падлягаюць рэгістрацыі. Прычым за валоданне сабакам трэба яшчэ і плаціць падатак. Але ці ўсе паступаюць паводле закона?

Толькі ў сталіцы, паводле слоў гендырэктара арганізацыі «Мінская гарадская жыллёвая гаспадарка» Марыны Тоўсцік, дэ-юрэ пражывае 1,5 тысячы хатніх катоў і 13,8 тысячы сабак. Дэ-факта ж, паводле ацэнак спецыялістаў, прыкладна ў пяць разоў больш. А гэта непарадак. Таму ў сталіцы вырашылі стымуляваць аматараў жывёл да выканання іх абавязкаў — рэгістрацыі гадаванцаў і выплаты падатку на сабак.

— Ужо ў сакавіку ў папяровых і электронных рахунках-апавяшчэннях на аплату ЖКП будзе размешчана напамінанне пра неабходнасць зарэгістраваць хатнюю жывёлу, — расказала гендырэктар МГЖГ.

— Да 1 ліпеня, падчас так званага пераходнага перыяду, мы будзем нагадваць пра неабходнасць выканання нормаў заканадаўства. А ўжо ў рахунку-апавяшчэнні за ліпень плануем, з улікам наяўнай інфармацыі пра незарэгістраваных хатніх жывёл, уключаць у жыроўкі падатак для ўладальнікаў сабак — незалежна ад таго, зроблена рэгістрацыя ці не.

Адкуль інфармацыя?

Каб налічыць падатак на незарэгістраванага сабаку, неабходна ўстанавіць, што жывёла пражывае ў кватэры. Адпаведная работа ўжо вядзецца. Татальныя праверкі і масавыя рэйды камунальнікі, зразумела, праводзіць не будуць. У іх свае метады атрымання інфармацыі, заяўляюць у МГЖГ. Напрыклад, яна паступае з месцаў — як з жыллёва-эксплуатацыйных участкаў, так і з адміністрацый раёнаў і ветэрынарных клінік. Пільныя суседзі — чаму б і не?

— Падмогай з’яўляюцца ў тым ліку звароты грамадзян, — кажа Марына Тоўсцік. — Напрыклад, нядаўна мы разглядалі зварот, які ў выніку падштурхнуў людзей зарэгістраваць трох хатніх жывёл у адным пад’ездзе.

Паводле слоў гендырэктара, калі паступае інфармацыя пра наяўнасць сабакі ў кватэры, ЖЭУ абавязана на працягу 15 дзён зафіксаваць гэты факт і ўдакладніць ва ўладальніка, ці ёсць у жывёлы афіцыйная рэгістрацыя. Калі ёсць, значыць, падатак ужо налічваецца. Калі пацвярджальных дакументаў няма, уключаецца рэжым прафілактыкі і папярэджання. І калі ўладальнік гадаванца праігнаруе прапанову прайсці рэгістрацыю, будзе запушчана працэдура спагнання падатку.

У МГЖГ нагадалі: санкцыі за парушэнне правілаў утрымання сабак — штраф у памеры ад 1 да 15 базавых велічынь (арт. 16.30 КаАП). І займаюцца гэтым галоўным чынам работнікі жыллёва-камунальных службаў. А вось калі гаспадар гадаванца праігнаруе налічаны падатак, у справу ўступаюць прадстаўнікі іншага ведамства.

— Мера адказнасці за нявыплату падатку на валоданне сабакам дакладна такая ж, як для любога неплацельшчыка падаткаў, — тлумачыць намеснік начальніка інспекцыі Міністэрства па падатках і зборах па горадзе Мінску Вольга Тарасевіч.

— Гэта штраф 15 працэнтаў ад нявыплачанай сумы падатку, але не менш за 0,5 базавай велічыні (артыкул 14.4 КаАП).

Падатак за валоданне сабакамі іх гаспадары павінны плаціць штоквартальна з моманту дасягнення жывёлай узросту трох месяцаў. Сума разавай выплаты ў 2026 годзе — 14 рублёў (67 рублёў — за сабаку патэнцыйна небяспечнай пароды). У Мінску і таго менш: за звычайнага сабаку трэба плаціць усяго 11,1 рубля ў квартал.

Артыкулам 309—1 Падатковага кодэкса ўстаноўлены льготы па падатку за валоданне сабакамі. Ад выплаты вызваляюцца:

♦ інваліды, якія валодаюць сабакам-павадыром, інваліды I і II групы, інваліды III групы (толькі на аднаго сабаку);

♦ грамадзяне, якія дасягнулі агульнаўстаноўленага пенсійнага ўзросту альбо маюць права на пенсію са зніжаным агульнаўстаноўленым пенсійным узростам (толькі на аднаго сабаку);

♦ бацькі (усынавіцелі), якія выхоўваюць дзяцей-інвалідаў ва ўзросце да 18 гадоў, альбо ў шматдзетных сем’ях з трыма і больш дзецьмі да 18 гадоў (толькі на аднаго сабаку);

♦ асобы, што пражываюць у аднакватэрных або блакіраваных жылых дамах (на аднаго сабаку).

— Калі льгот няма, то суму падатку, якая з’явіцца ў жыроўцы, трэба ўнесці адначасова з разлікамі за ЖКП, — удакладняе Вольга Тарасевіч.

• 1
• 0
• 3
• 2
• 0
• 0
• 2
• 0