Багацце заснавальніка месенджара Telegram Паўла Дурава значна зменшылася. Паводле часопіса Forbes, ягоны капітал скараціўся з 17,1 мільярда даляраў да 6,6 мільярда, гэта значыць прыкладна на 61%, піша The Moscow Times.
Асноўная прычына — зніжэнне ацэнак падобных тэхналагічных кампаній. За апошні год Telegram не рабіў новых адкрытых прэзентацый для інвестараў, а таму магчымасць выхаду кампаніі на біржу (IPO) цяпер выглядае менш верагоднай. Акрамя таго, месенджар блакуецца на некаторых ключавых рынках, у тым ліку ў Расіі і Іране, што таксама ўплывае на ацэнку кампаніі.
Аналітыкі прапануюць параўноўваць Telegram з найбліжэйшым канкурэнтам — амерыканскім месенджарам Snapchat. Па колькасці карыстальнікаў яны падобныя: у Snapchat на канец 2025 года было каля 946 мільёнаў карыстальнікаў, а ў Telegram — больш за 1 мільярд. Аднак выручка Snapchat у 2025 годзе склала 5,9 мільярда даляраў, што амаль утрая больш за прагназаваныя 2 мільярды даляраў Telegram. Пры гэтым Snapchat завяршыў год са стратамі 460 мільёнаў даляраў, а Telegram паказаў страты 222 мільёны даляраў толькі за першае паўгоддзе. На фоне гэтага капіталізацыя Snapchat за год знізілася амаль удвая — да 8,7 мільярда даляраў, што паўплывала і на пераацэнку Telegram.
Дадатковы ціск на фінансы кампаніі можа аказаць неабходнасць пагашэння аблігацый. Першы выпуск аблігацый Telegram, разлічаны на пяць гадоў з купонам 7%, павінен быць пагашаны 22 сакавіка 2026 года. Кампанія ўжо часткова рэфінансавала доўг, але ёй яшчэ трэба выплаціць каля 1,1 мільярда даляраў. У чэрвені Telegram выпусціў новыя аблігацыі на 1,7 мільярда даляраў з больш высокай даходнасцю — 9%, што сведчыць пра рост рызык для інвестараў.
Павел Дураў упершыню трапіў у рэйтынг Forbes у 2016 годзе, калі яго багацце ацэньвалася на 600 мільёнаў даляраў. У 2018 годзе ён стаў мільярдэрам. Найвышэйшую ацэнку — каля 17,2 мільярда даляраў — яго капітал атрымаў у 2021 годзе, калі Telegram выпусціў першыя аблігацыі з магчымасцю абмену на акцыі пасля будучага IPO. Тады інвестары ацэньвалі кампанію прыкладна на 30—35 мільярдаў даляраў.
Некаторыя аналітыкі мяркуюць, што Дураў можа часткова разлічыцца з інвестарамі акцыямі Telegram без правядзення IPO. Сярод інвестараў, якія куплялі апошні выпуск аблігацый, называюцца буйныя фонды, у тым ліку BlackRock, Abu Dhabi і Mubadala. Магчыма, ім паабяцалі долю ў кампаніі.
Цяпер чытаюць
Мігранцкі крызіс, арганізаваны Лукашэнкам, — усё? Вось што паказваюць лічбы4
Каментары
...як кажуць канапныя экспэрты, са спасылкамі ні на што канкрэтна )
У телеграма часткова закрыты код і адсутнічае шыфраванне by default.
У кошжнага карыстальніка есць ID які нельга памяняць, а яшчэ ен перадае MAC адрас прылады з якой карыстаюцца. Рэгістрацыя па нумары телкфону і тое што Дураў блакаваў каналы Навальнага, але не блакуе каналы Zтнікаў і беларускіх прапагандыстаў. Тое што Телеграм выкарыстоўваецца ўсімі дзяржаўнымі расейскімі ўстановамі - нават калі мессанджар быў "нібыта" заблакаваны на тэрыторыі РФ.
Яшчэ пытаннечкі ёсць?