«А я вам пакажу, адкуль на «Оскар» рыхтаваўся напад». Беларусы жартуюць з вусоў Ды Капрыа
Папулярны амерыканскі акцёр Леанарда Ды Капрыа змяніў імідж, адгадаваўшы вусы. Новы вобраз галівудскай зоркі, у якім ён з’явіўся на цырымоніі ўручэння «Оскара», не застаўся ў сацсетках без увагі.
Хвалю жартаў сярод беларусаў запусціў сэрвіс па продажы авіябілетаў Aviasales, апублікаваўшы фота акцёра ў сацсетцы Threads з подпісам:
«Добрая спроба стаць папулярным у беларускай частцы Трэдса, Леа, добрая спроба…»
Каментатары адразу падхапілі жарт.
«Гэта таму, што ў ім прачынаюцца беларускія карані», — адзначыў адзін з чытачоў.
Для тых, хто не адразу зразумеў сутнасць жарту, іншыя карыстальнікі патлумачылі лаканічна:
«Вусы, як у бацькі».
Некаторыя інтэрнэт-умельцы вырашылі давесці вобраз да ідэалу: з дапамогай фоташопа Ды Капрыа змянілі прычоску на зачасаную залысіну.
«Я проста чую гэты хрыплаваты, знаёмы да болю голас», — пішуць у каментарах.
Карыстальнікі нават пачалі прыпісваць акцёру цытаты, стылізаваныя пад манеру выказванняў Аляксандра Лукашэнкі:
«Я плаваў на Цітаніку», «А я вам пакажу, адкуль на «Оскар» рыхтаваўся напад».
Некаторыя проста размясцілі мемы:
Іншыя пайшлі яшчэ далей і зрабілі Ды Капрыа «вялікім камбінатарам» Астапам Бэндэрам.
Увагу на вусы акцёра звярнула і «Лідскае піва». Завод апублікаваў мем з подпісам:
«Калі замест «бакал» сказаў «келіх» і цяпер адчуваеш сябе мінімум Радзівілам».
Ды Капрыа, дарэчы, не адзіны галівудскі акцёр, хто змяніў вобраз. Цімаці Шаламе (вядомы па «Дзюне») і Джэйкаб Элордзі (сыграў галоўную ролю ў «Гразавым перавале») таксама цяпер з вусамі.
А Педра Паскаль наадварот пагаліўся (некаторыя жартуюць, што гэта яго вусы перакачавалі да Ды Капрыа).
Каментары