«Вось не сорамна, што Жлобін такі горад немаленькі, а парку дзецям няма?»
Дзяўчына са Жлобіна ў тыктоку зрабіла агляд на гарадскія каруселі, заўважылі «Моцныя навіны».
Паводле аўтаркі, парк выглядае «старажытным», тут дзесяцігоддзямі няма ніякіх абнаўленняў, акрамя слаёў фарбы на старых платах. Яна кажа, што парку не менш за 30 гадоў.
«І акрамя адной каруселі за гэты час нічога не змянілася. Абсалютна. Тая ж агароджа, пафарбаваная пяццюстамі слаямі фарбы. Гэтыя ж машынкі, таксама страшныя, іржавыя, перафарбаваныя. Нічога не абнаўляецца. Вось ці не сорамна, што Жлобін такі горад немаленькі, а парку дзецям няма?» — кажа яна.
У каментарыях разгарнулася дыскусія пра сапраўдны ўзрост парку. Калі аўтарка відэа выказала здагадку, што яму каля 30 гадоў, то старажылы паправілі: парку ўжо больш за 50, а то і 60 гадоў.
«Мне зараз 68, і гэтыя атракцыёны стаялі яшчэ ў маёй юнацкасці», — пішуць жлобінцы.
Гараджане ўспамінаюць, што ў 80‑х набор забаў быў значна багацейшы. Тады працавалі «Рамонак», «Аўтадром», «Ланцуговая карусель», цір і знакамітыя «Лодачкі». Святы ў парку адзначалі цэлымі сем'ямі з шашлыкамі і сапраўднай весялосцю.
Цяперашні стан атракцыёнаў выклікае ў жыхароў не радасць, а трывогу: «Вясёлыя горкі» не працуюць, папулярны «Вальс» увесь час ламаецца, асабліва ў пікавыя святы накшталт Івана Купалы. І замест паўнавартаснага абнаўлення ў парку перарабілі плітку з лаўкамі, але самі каруселі засталіся «каравымі і іржавымі».
Многія пішуць, што вазіць дзяцей на атракцыёны даводзіцца ў Мінск ці Гомель, бо на мясцовых канструкцыях, якія «страшна рыпяць», катацца небяспечна.
Жлобінцы задаюцца пытаннем: чаму ў немалым горадзе адкрываюцца дзясяткі аднолькавых крам, а адзінае месца для дзіцячага адпачынку знаходзіцца ў такім запусценні?
«Гэта спецыяльна не прыбіраюць, каб можна было фільмы пра СССР здымаць без дэкарацый», — іранізуюць гараджане.
-
«Паставілі на лічыльнік яшчэ ў турме». Ігар Карней расказаў, чым скончылася гісторыя з судовымі выканаўцамі і штрафамі
-
87 рублёў заробку і асаблівыя ўмовы для некаторых студэнтаў. Выкладчык БДУІР звярнуўся да Лукашэнкі
-
Першы беларускі пашпарт з «Пагоняй» атрымаў Лукашэнка, а другі — школьнік Юрый Чарняк. Як склаўся лёс хлопца?
Цяпер чытаюць
Першы беларускі пашпарт з «Пагоняй» атрымаў Лукашэнка, а другі — школьнік Юрый Чарняк. Як склаўся лёс хлопца?8
Каментары