У Германіі хочуць забараніць начное кашэнне газонаў, бо гэта шкодзіць вожыкам
У Германіі прапануюць забараніць касіць газоны ўначы, каб абараніць вожыкаў. Мэры нямецкіх гарадоў лічаць, што газонакасілкі, асабліва рабатызаваныя, небяспечныя для гэтых жывёл, піша The Guardian.
Рэч у тым, што вожыкі — начныя істоты, і калі адчуваюць небяспеку, яны не ўцякаюць, а згортваюцца ў клубок. З-за гэтага датчыкі касілак часта не могуць іх распазнаць, і жывёлы атрымліваюць траўмы ад нажоў.
Прадстаўніца Нямецкай федэрацыі гарадоў Клаўдыя Каліш адзначыла, што гарады ўсё часцей становяцца месцам жыцця для дзікіх жывёл, бо іх натуральнае асяроддзе скарачаецца. Таму забарона на начное выкарыстанне касілак выглядае лагічнай мерай абароны.
Паводле наяўных даных, колькасць вожыкаў у свеце за апошняе дзесяцігоддзе скарацілася як мінімум на 30%. З 2024 года яны ўключаныя ў чырвоны спіс як від, якому пагражае знікненне.
Акрамя касілак, небяспеку для вожыкаў уяўляюць таксама прылады для збору лісця, асабліва калі жывёлы знаходзяцца ў спячцы. Вялікая частка вожыкаў таксама гіне пад коламі аўтамабіляў.
Навукоўцы з Оксфардскага ўніверсітэта разам з дацкімі калегамі правялі даследаванне і высветлілі, што вожыкі чуюць ультрагук. Гэта можа дапамагчы адганяць іх ад дарог з дапамогай спецыяльных гукаў.
Акрамя таго, даследчыкі стварылі мадэлі вожыкаў з дапамогай 3D-друку, каб разам з вытворцамі распрацаваць сістэму сертыфікацыі «бяспечных для вожыкаў» газонакасілак. Паводле навукоўцаў, траўмы ад такіх прылад ствараюць вялікую нагрузку на цэнтры дапамогі жывёлам, а пацярпелых вожыкаў часта знаходзяць толькі праз некалькі дзён або тыдняў, калі яны ўжо моцна пакутуюць.
Каментары
Эй, где же вы, остряки и эксперты-экологи?