На трасе ў Віцебскай вобласці зробяць масты-тунэлі для дзікіх жывёл
У Віцебскай вобласці працягваецца маштабная рэканструкцыя аўтадарогі Р46, якая злучае Лепель і Полацк. Падчас будаўніцтва выкарыстоўваюць як звыклыя тэхналогіі, так і новыя рашэнні, піша БелТА.
Работы пачаліся ў лістападзе 2024 года. За гэты час ужо адкрылі каля 30 кіламетраў дарогі — ад Полацка да вёскі Сарочына. Яшчэ прыкладна такі ж участак плануюць завяршыць да восені, каб цалкам абнавіць трасу да Лепеля.
Падчас будаўніцтва выкарыстоўваюць як звыклыя тэхналогіі, так і новыя рашэнні. Напрыклад, упершыню тут робяць спецыяльныя пераходы для дзікіх жывёл. Над дарогай узводзяць своеасаблівыя масты з тунэлямі, пад якімі будуць праходзіць ласі, казулі і алені. Уздоўж лясных участкаў ставяць трывалыя агароджы, каб жывёлы не выбягалі раптоўна на дарогу, а ішлі да бяспечных пераходаў.
Праект вельмі буйны: на ім працуе каля 70 чалавек і дзясяткі адзінак тэхнікі. Частка рабочых прыязджае штодня, іншыя працуюць вахтавым метадам.
Асобная ўвага надаецца водаадводу. Каб вада не затрымлівалася і не ўтваралася балотаў, праз кожныя 600—700 метраў ставяць спецыяльныя трубы рознага дыяметра. Старыя матэрыялы таксама выкарыстоўваюць паўторна — бетон перапрацоўваюць і ўжываюць для ўмацавання ўзбочын.
Дарожнае пакрыццё робяць шматслойным: спачатку здымаюць частку старога асфальту, потым укладваюць шчэбень, ніжні і верхні пласты асфальтабетону. Пасля рэканструкцыі шырыня дарогі складзе каля 12 метраў. Хоць палос руху застанецца дзве, прапускная здольнасць і бяспека істотна павялічацца.
Акрамя самога пакрыцця, ставяць бар’ерныя агароджы, асвятленне, пешаходныя элементы, аўтобусныя прыпынкі і сотні дарожных знакаў. Таксама праводзіцца рамонт моста праз раку Выдрыца.
Усяго на аб’екце плануецца выкарыстаць больш за мільён тон розных матэрыялаў, уключаючы грунт і асфальт.
Для бяспекі кіроўцаў падчас работ рух часткова арганізаваны па адной паласе са святлафорамі. Пасля завяршэння будаўніцтва нанясуць зносастойкую разметку, у тым ліку так званую «гучную» — яна дапамагае кіроўцам не заснуць за рулём.
На рэалізацыю праекта ў гэтым годзе выдзелена каля 90 мільёнаў рублёў. У цэлым у Віцебскай вобласці плануюць яшчэ больш павялічыць фінансаванне дарожных работ і працягнуць мадэрнізацыю іншых трас.
Каментары
упершыню дзе? хіба што ў раёне, бо экадукі ў краіне ўжо даўно ёсць (дарэчы першы пабудавалі дваццаць гадоў таму на суседняй М3 у Бярэзінскім біясферным)
>Праект вельмі буйны: на ім працуе каля 70 чалавек і дзясяткі адзінак тэхнікі.
усё адносна, буйны хіба што ў параўнанні з адсутнасцю будаўніцтва дарог
>Асобная ўвага надаецца водаадводу. Каб вада не затрымлівалася і не ўтваралася балотаў, праз кожныя 600—700 метраў ставяць спецыяльныя трубы рознага дыяметра.
гэта ў балоцістых мясцінах? калі нават у Менску нават без Нямігі стандартныя інтэрвалы по 30 метраў будуюцца з улікам "адзін дзень у гаду можа тапіць і гэта норма"?
>шырыня дарогі складзе каля 12 метраў. Хоць палос руху застанецца дзве, прапускная здольнасць і бяспека істотна павялічацца.
у якой фізіцы павялічэнная хуткасць на шашы без (відавочна) падзяляльніка ды змен колькасьці палос забяспечвае большую бяспеку руха??? Vision Zero, ня слыхаў? Або гэта дзеля камер сярэдняй хуткасці (лічы, яшчэ грошаў папіліць)?
Рэзюмэ: навошта НН перадрукоўваць дзяржаўныя сметніцы, хіба не самой стаць ёю? Нават ШІ зможа лепш перадаць сутнасць без гэтых дзяржзваротаў ды савдэпаўскі-услаўляемых сказаў