Еўропа мае запасы авіяпаліва толькі да лета. Чаму так сталася і што рабіць?

Армузскі праліў, ключавы маршрут для авіяцыйнага паліва з Персідскага заліва, фактычна закрыты Іранам больш за шэсць тыдняў у адказ на атакі ЗША і Ізраіля. Гэта прывяло да рэзкага росту цэн і выклікала небяспеку дэфіцыту.

Выканаўчы дырэктар МЭА Фаціх Бірол паведаміў AP, што неўзабаве могуць пачаць адмяняць авіярэйсы, калі пастаўкі і далей будуць заблакаванымі.

У сваёй штомесячнай справаздачы аб рынку нафты агенцтва, якое кансультуе 32 краіны-члены па пытаннях энергазабеспячэння і бяспекі, заявіла, што экспарт з рэгіёна Персідскага заліва быў найбуйнейшай крыніцай авіяцыйнага паліва на сусветны рынак.

Нафтаперапрацоўчыя заводы ў іншых вялікіх краінах-экспарцёрах, такіх як Паўднёвая Карэя, Індыя і Кітай, самі моцна залежалі ад імпарту сырой нафты з Блізкага Усходу.

У выніку, крызіс «уставіў гаечны ключ у наладжаную працу рынкаў авіяцыйнага паліва», гаворыцца ў паведамленні.

У мінулым Еўропа спадзявалася на Блізкі Усход прыкладна на 75% імпарту авіяпаліва, адзначае МЭА.

На гэты момант еўрапейскія краіны спрабуюць замяніць пастаўкі з краін Персідскага заліва імпартам з іншых краін. Аналітыкі кажуць, што пастаўкі ідуць з ЗША і Нігерыі.

МЭА заявіла, што за апошнія тыдні назіраецца хуткае паскарэнне экспарту авіапаліва са ЗША.

Аднак у сваёй справаздачы агенцтва папярэджвае, што нават калі ўсе гэтыя пастаўкі будуць прызначаныя толькі для Еўропы, яны заменяць крыху больш за палову страчаных паставак.

Аналізуючы розныя сцэнарыі, МЭА адзначае, што калі ЕС не зможа замяніць больш за 50% свайго імпарту з Блізкага Усходу, «фізічны дэфіцыт можа ўзнікнуць у асобных аэрапортах, і гэта прывядзе да адмены рэйсаў і памяншэння попыту».

Калі тры чвэрці паставак удасца замяніць, такая ж сітуацыя ўсё яшчэ зможа ўзнікнуць, але не раней за жнівень.

Амаар Хан, кіраўнік аддзела цэнаўтварэння на авіяцыйнае паліва ў Еўропе ў Argus Media, лічыць, што нават калі пастаўкі з краін Персідскага заліва адновяцца ў найбліжэйшы час, дэфіцыт можа ўсё яшчэ назірацца напярэдадні летняга піку падарожжаў.

«Гэта не дакладна, але ўсё ж такі ўсё больш імаверна, што ў некаторых рэгіёнах Еўропы ўзнікне дэфіцыт. Вядома, аэрапорты накшталт Хітроу, верагодна, будуць мець прыярытэт над іншымі меншымі аэрапортамі або меншымі цэнтрамі попыту. Але так, нават калі гэтыя пастаўкі з'явяцца, гэта зойме пяць-шэсць тыдняў», — сказаў ён.

Многія авіякампаніі па ўсім свеце былі вымушаныя прыняць экстранныя меры, каб супрацьдзейнічаць росту кошту паліва, які звычайна складае 20—40% іх аперацыйных выдаткаў.

У пачатку красавіка цана на авіяпаліва ў Еўропе дасягнула гістарычнага максімуму на 1838 даляраў за тону, у параўнанні з 831 далярам да пачатку вайны ў Іране.

Раней на гэтым тыдні Еўрапейская камісія заявіла, што «няма доказаў дэфіцыту паліва» ў Еўрапейскім Саюзе, але прызнала, што «ў найбліжэйшы час» могуць узнікнуць праблемы з пастаўкамі.

Прэс-сакратар Еўракамісіі паведаміў на брыфінгу для прэсы, што пастаўкі сырой нафты на нафтаперапрацоўчыя заводы ЕС «стабільныя, і на гэты момант няма патрэбы ў дадатковым адкрыцці запасаў».

Камісія заявіла, што каардынацыйныя групы па пытаннях нафты і газу сустракаюцца штотыдзень, а энергетычныя меры будуць абвешчаныя прэзідэнтам камісіі на наступным тыдні.

На мінулым тыдні гандлёвы орган еўрапейскіх аэрапортаў, Міжнародная рада аэрапортаў, напісаў у Еўракамісію ліст з папярэджаннем, што кантынент можа сутыкнуцца з дэфіцытам авіяпаліва, калі Армузскі праліў не адкрыецца ў наступныя тры тыдні.

Галіновая група Airlines for Europe заклікала ЕС удакладніць свае правілы кампенсацыі пасажырам, каб гарантаваць, што дэфіцыт паліва або закрыццё паветранай прасторы будуць разглядаць як «надзвычайныя абставіны».

Гэта будзе азначаць, што калі дойдзе да адмены рэйсаў, авіакампаніі не павінны рабіць значныя кампенсацыйныя выплаты.

У справаздачы аб гандлі, апублікаванай раней у чацвер, EasyJet паведаміла, што ў сакавіку панесла дадатковыя выдаткі на паліва на суму 25 мільёнаў фунтаў стэрлінгаў (прыкладна 33,8 мільёна даляраў ЗША) праз канфлікт на Блізкім Усходзе.

Гэта адбылося нягледзячы на тое, што авіякампанія забяспечыла больш за тры чвэрці свайго авіяпаліва па фіксаванай цане да таго, як цэны выраслі — гэта працэс, вядомы як хэджаванне. Яна заявіла, што канфлікт выклікаў «кароткатэрміновую няпэўнасць адносна кошту паліва і попыту кліентаў».

Нідэрландская авіякампанія KLM заявіла, што адменіць 160 рэйсаў у Еўропе ў наступным месяцы праз рост цэн на паліва. Яна, праўда, удакладніла, што гэта менш за 1% яе еўрапейскіх рэйсаў, дадаўшы, што на гэты момант не адчувае дэфіцыту авіяпаліва.

• 0
• 0
• 1
• 1
• 1
• 0
• 1
• 0