У Бранскай вобласці ад удара дрона загінуў падарожнік, які ў камуфляжы ішоў пехатой у Бразілію
Падарожнік па мянушцы Саша Конь ішоў з Разанскай вобласці ў Лацінскую Амерыку. Цяжка сказаць, зыходзячы з якіх меркаванняў ён планаваў свой маршрут, аднак жа чамусьці падышоў пад самую мяжу з Украінай.
13 мая ўлады Бранскай вобласці паведамлялі пра атаку дрона па вёсцы Старая Пагошч у памежным з Украінай Суземскім раёне, у выніку якой загінуў ураджэнец Стаўрапольскага краю. Імя тады не называлася.
Пазней з’явілася інфармацыя, што загінулым можа быць менавіта Саша Конь, хоць дакументаў пры ім не знайшлі.
37‑гадовы падарожнік стаў вядомы пасля таго, як у пачатку красавіка выправіўся пешшу з Разанскай вобласці ў Бразілію. Ён быў апрануты ў камуфляжнае адзенне, цягнуў за сабой самаробны вазок вагой каля 300 кілаграмаў і, паводле паведамленняў, праходзіў ад 15 да 30 кіламетраў за дзень.
Сашу Каня заўважылі ў Бранскай вобласці яшчэ 5 мая. Па словах мужчыны, у Лацінскую Амерыку ён адправіўся «ў пошуках сябе», таму што вырашыў пакінуць «хранічную мітусню». Цяпер ён пакінуў яе навечна.
Вёска Старая Пагошч знаходзіцца за 5,5 км ад украінскай мяжы па прамой і рэгулярна падвяргаецца атакам УСУ.
Каментары