Найвышэйшы вайсковы чыноўнік ЗША прыбудзе ў Польшчу пасля раптоўнага рашэння не разгортваць брыгаду
Візіт генерала Кейна ў Варшаву запланаваны на сераду і выклікае вялікую цікавасць у Польшчы.
На наступным тыдні ў Варшаву прыбудзе генерал Дэн Кейн, старшыня Аб’яднанага камітэта начальнікаў штабоў Узброеных сіл ЗША, каб абмеркаваць рашэнне аб адмове ад накіравання амерыканскай бранятанкавай брыгады ў Польшчу, паведамляе RMF 24.
Візіт генерала Кейна ў Варшаву запланаваны на сераду і выклікае вялікую цікавасць у Польшчы. Яго прыезд адбываецца ў момант, калі вайсковыя стасункі паміж Варшавай і Вашынгтонам апынуліся ў цэнтры ўвагі пасля раптоўнага абвяшчэння ЗША пра адмову ад накіравання чатырох тысяч вайскоўцаў у Польшчу.
Камандуючы амерыканскімі сухапутнымі войскамі генерал Крыстафер ЛаНеве падкрэсліў, што з улікам атрыманых ім указанняў скасаванне накіравання бранятанкавай брыгады ў Польшчу «было найбольш разумным варыянтам».
Гэтая інфармацыя выклікала шматлікія пытанні адносна будучыні прысутнасці амерыканскіх войскаў у Польшчы і бяспекі ўсяго рэгіёна Цэнтральна-Усходняй Еўропы.
Віцэ-прэм’ер-міністр і міністр нацыянальнай абароны Уладзіслаў Касіняк-Камыш запланаваў сустрэчу з генералам Кейнам, падчас якой павінны быць абмеркаваныя далейшыя крокі і магчымасці вайсковага супрацоўніцтва.
Адначасова з панядзелка ў Злучаных Штатах будуць знаходзіцца намеснікі міністра абароны — Цэзарычй Томчык і Павел Залеўскі. Іх задачай будзе правядзенне перамоў на міжнародным узроўні і прадстаўленне польскай пазіцыі па гэтым пытанні.
Як вынікае з дамоўленасцяў, да гэтых захадаў далучыцца таксама МЗС Польшчы, якое будзе праводзіць уласныя дыпламатычныя ініцыятывы.
ЛаНеве заявіў у Палаце прадстаўнікоў ЗША, што не ведае, ці была Польшча праінфармаваная пра прыпыненне запланаванай перакідкі бранятанкавай брыгады. Ён таксама не змог адказаць на пытанне, ці існуюць планы замены брыгады ў Польшчы.
Выданне Politico паведаміла, што чыноўнікі Пентагону былі здзіўленыя гэтым рашэннем.
Каментары