VIP-зала, фудкорты і планетарый. Найстарэйшы кінатэатр Магілёва ў стылі канструктывізму закрылі на рэканструкцыю
Знікненне з 9 мая найстарэйшага магілёўскага кінатэатра «Чырвоная Зорка» з гарадскіх афіш выклікала пытанні ў многіх жыхароў горада. Спачатку супрацоўнікі спасылаліся на абстрактныя «тэхнічныя прычыны», а адміністрацыя «Кінавідэапраката» дала лаканічны адказ: падрыхтоўка да рэканструкцыі. Разабраліся, ува што ператворыцца помнік канструктывізму 1930 года пасля маштабнай рэканструкцыі.
Кінатэатр на вуліцы Першамайскай быў пабудаваны ў 1930 годзе на месцы дарэвалюцыйнага ілюзіёна «Чары», а той у сваю чаргу з’явіўся на падмурках згарэлага экзерцыргаўза — гіганцкага манежа, узведзенага знакамітым расійскім архітэктарам Васілём Стасавым.
Аўтарам праекта кінатэатра называецца інжынер Э. Лосер — асоба абсалютна загадкавая, бо акрамя гэтага прозвішча з ініцыяламі, якія ўпершыню былі названыя ў кнізе «Гісторыя архітэктуры Беларусі. Савецкі перыяд» (1975) гісторыкам архітэктуры Анатолем Воінавым, пра яго нічога больш не вядома. У апублікаванай у 1983 годзе кнізе, прысвечанай «Белдзяржпраекту», у пераліку выбітных спецыялістаў даваеннага часу называецца нейкі «Р. Е. Лоссер», але далей, у раздзеле праектаў у подпісах да фотаздымкаў зноў з’яўляецца Э. Лосер.
Той жа Воінаў паведамляе, што Лосер быў таксама аўтарам і сталічнага кінатэатра «Чырвоная Зорка» (1928 год), які не захаваўся да нашых дзён. Магілёўскі будынак, нягледзячы на разбурэнні Другой сусветнай вайны і наступныя перабудовы ў 1948 і 1954 гадах, дайшоў да нас у сваім арыгінальным выглядзе з невялікімі стратамі.
Ад імерсіўнага кіно да VIP-зон: што зменіцца ўнутры
Згодна з заданнем на праектаванне, зацверджаным у 2025 годзе, унутраная прастора кінатэатра мусіць быць цалкам перафарматаваная.
На першым паверсе асноўная перапланіроўка закране галоўную кіназалу і частку фае. Тут плануецца стварыць адразу тры прасторы для прагляду. Вялікая глядзельная зала на 200 месцаў будзе пераабсталявана пад функцыі імерсіўнага кіно і планетарыя. Акрамя яе, з'явяцца другая, «сямейная» зала на 60 месцаў і невялікая зала-«камфорт» на 30 месцаў.
Касы, для якіх цяпер нарэзаны памяшканні ў параднай, паўкруглай частцы будынка, аб'яднаюць у адну лінію з кінабарам, дзе прадугледжана паўнавартасная кухня для абслугоўвання наведвальнікаў. Таксама на першым паверсе вылучаць плошчы пад фудкорт і агульны гардэроб.
На другім паверсе акцэнт будзе зроблены на прэміяльны адпачынак. Там мусіць з’явіцца VIP-зала на 30 месцаў, якая атрымае ўласны гардэроб. Побач размесцяць асобную гульнявую зону (таксама са сваім гардэробам) і яшчэ адзін кінабар. Як і на ніжнім узроўні, частка плошчаў другога паверха будзе аддадзена пад другі фудкорт.
Сучасны выгляд глядзельнай залы кінатэатра. Фота: chyrvonayazorka_mogilev
Сучасны выгляд фае кінатэатра. Фота: Гугл Карты
Кіраванне ўсімі чатырма заламі будзе ажыццяўляцца цэнтралізавана з адной апаратнай.
Усе кіназалы павінны атрымаць сучаснае тэхнічнае абсталяванне: 4K лазерныя праектары і сістэмы аб'ёмнага гуку. Для стварэння адзінай атмасферы ва ўсіх холах, калідорах, касах і санузлах усталююць цэнтралізаваную музычна-інфармацыйную сістэму. Для фізічна аслабленых наведавальнікаў у будынку абсталююць ліфт.
Што тычыцца тэрмінаў рэалізацыі гэтага маштабнага праекта, то да канца мая мусіла быць скончана распрацоўка праектна-каштарыснай дакументацыі, паведамленне «Кінавідэапраката» пра закрыццё ў сувязі з правядзеннем праектных і вышукальніцкіх работ або ўводзіць у зман, або сведчыць пра значнае адставанне ад графіку. Згодна з ранейшымі планамі будаўнічыя работы павінны быць выкананы ў 2027 годзе.
«Наша Нiва» — бастыён беларушчыны
ПАДТРЫМАЦЬ-
«Я еду натхніцца ўкраінцамі». Святлана Ціханоўская пачала афіцыйны візіт ва Украіну
-
«Думалі, бандыты, аказалася — паліцыя». Удзельнікі перастрэлкі ў Польшчы расказалі сваю версію, але пытанняў менш не стала
-
З-за школьнай парты — у намёт на 15 чалавек. Як старшакласнікаў будуць прымусова рыхтаваць да службы
Цяпер чытаюць
«Я еду натхніцца ўкраінцамі». Святлана Ціханоўская пачала афіцыйны візіт ва Украіну7
Каментары