Беларуская кампанія выпусціла дрып-каву з водарамі нашых гарадоў
Беларуская кампанія Daloni Coffee выпусціла тэматычны набор дрып-кавы «Смак Радзімы», прысвечаны гарадам Беларусі. У калекцыю ўвайшлі 12 смакаў, частка з якіх прадстаўлена монагатункамі, а для абласных цэнтраў і Мінска распрацавалі аўтарскія кававыя сумесі, піша Hrodna Life.
У набор уключылі смакі, прысвечаныя Мінску, Брэсту, Гродну, Віцебску, Магілёву, Гомелю, Бабруйску, Лідзе, Пінску, Лунінцу, Полацку, Рагачову і Глыбокаму.
Пра набор кампанія расказала ў Threads.
У каментарах яе прадстаўнікі адзначылі, што не змаглі ўключыць усе гарады адразу. Але калі будзе цікавасць пакупнікоў да іншых мясцін, то там плануюць і другую частку калекцыі з іншымі населенымі пунктамі. Каментатары прасілі, напрыклад, Нарач і Баранавічы.
Асобна ў каментарах кампанія расказала пра распрацоўку дрыпа для Ліды. Для яго стварылі спецыяльную ферментацыю з выкарыстаннем нямецкага хмелю і цёмнага піва. А вось якія на смак іншыя гарады, можна даведацца, пакаштаваўшы «Смак Радзімы».
«Гарадскі» набор каштуе 57 рублёў і ўключае ў сябе 12 дрып-пакетаў.
Таксама Daloni Coffee выпусціла турыстычны сэт разам з праектам Vander Group. У яго ўвайшлі дрып-пакеты і «пашпарт вандроўніка» для паездак па Беларусі. Кошт набору склаў 99 рублёў.
Дрып-пакет — гэта кампактны папяровы фільтр з порцыяй меленай кавы. Для прыгатавання напою не патрабуецца кававарка ці турка — дастаткова заліць каву гарачай вадой. У кожным пакеце знаходзіцца каля 12 грамаў кавы. Вытворцы выкарыстоўваюць азотную ўпакоўку, дзякуючы якой прадукт даўжэй захоўвае свежасць і водар. Тэрмін прыдатнасці набору складае шэсць месяцаў.
Тэхналогія дрып-кавы з’явілася ў Японіі ў 1990‑х гадах. Пазней канструкцыю ўдасканалілі: фільтр сталі замацоўваць над кубкам, каб вада праходзіла праз пласт меленай кавы.
Кампанія Daloni Coffee пачала працу ў 2015 годзе. Яе заснаваў Дзмітрый Кіслякоў, які да таго моманту ўжо больш за 13 гадоў займаўся вытворчасцю кавы. Першапачаткова брэнд называўся Coffee Everyday і выпускаў пяць кававых блендаў, названых па днях тыдня — ад панядзелка да пятніцы. Пазней кампанія пашырыла асартымент і засяродзілася на specialty coffee і монагатунках арабікі.
У 2023 годзе кампанія правяла рэбрэндынг і афіцыйна стала называцца Daloni Coffee. Назва звязана са словам «далоні».
«Мы выбралі слова «Далоні» для нашага брэнда, таму што лічым, што далоні людзей — гэта найважнейшы элемент кававага шляху ад ягады да кубка», — напісана на сайце кампаніі.
Каментары