«Цуды апакаліптычнага свету». На Данбасе птушкі віюць гнёзды з дронавага оптавалакна
Украінскі навуковец Алег Мальчанка, доктар гістарычных навук, які цяпер ваюе ў складзе УСУ на Данбасе, паказаў незвычайнае птушынае гняздо, часткова звітае з аптычнага валакна, якое выкарыстоўваецца ў дронах.
Па словах Алега Мальчанкі, пасля выбуху кіраванай авіяцыйнай бомбы было павалена дрэва, а з яго кроны выпала гняздо, у якое разам з травой і галінкамі былі ўплеценыя кавалкі дронавага оптавалакна. Мальчанка назваў такую знаходку «цудам апакаліптычнага свету» і прыкладам таго, як жывёлы прыстасоўваюцца да новых умоў жыцця нават у зоне баявых дзеянняў.
Ён адзначыў, што птушкі выкарыстоўваюць усе даступныя ім матэрыялы для будаўніцтва сваіх гнёздаў, таму рэшткі сучасных вайсковых тэхналогій таксама становяцца часткай навакольнага асяроддзя. На яго думку, гэта сімвалічна адлюстроўвае здольнасць жывой прыроды прыстасоўвацца да самых складаных абставін.
Разам з тым вайсковец звярнуў увагу на негатыўныя наступствы вайны для птушак. Паводле яго назіранняў, пастаянныя выбухі і стрэлы часта выклікаюць у іх кантузіі і дэзарыентацыю. Некаторыя птушкі падаюць з дрэў, іншыя, узляцеўшы, уразаюцца ў будынкі або слупы.
Алег Мальчанка таксама расказаў пра вялікага стракатага дзятла, які доўгі час жыў каля іх бліндажа і, здавалася, не звяртаў увагі на грукат артылерыі. Аднак падчас аднаго з авіяўдараў птушка загінула ад аскепкаў разбуранага даху суседняга дома.
Музыка Цім Суладзэ: Розніца 30 гадоў — тое, што адпавядае маім уяўленням пра адносіны41
Каментары
У мяне пад астрэшкам сініцы знайшлі сабе схованку ды засяліліся туды. Цяпер стуль пішчаць малыя, а яны абодва носяць ім ежу. Прылятуць, у дзюбах нешта трымаюць, а да гнязда не сьпяшаюцца, сядзяць на плоце ды вывучаюць абстаноўку, ці няма побач ворага якога, і калі ўсё чыста - нясуць ежу да малых. А тыя таксама хітрыя, хаця й малыя, сядзяць ціха, каб ня выдаць сябе. Але, калі доўгі час цішыня, дык робяцца сьмялейшымі, пачынаюць сваё ціўканьне, і адразу змоўкнуць, ледзь пачуюць які шоргат.