Стала вядома пра вынікі праверкі па скарзе аб збіцці вучня ў полацкай спартыўнай школе
Пасля з’яўлення ў інтэрнэце паведамлення маці дзіцяці пра збіццё яе сына падчас трэніроўкі па дзюдо на сітуацыю адрэагавалі кіраўніцтва спартыўнай школы, аддзел спорту Полацкага райвыканкама, РАУС і медыцынскія службы, піша «Полоцкий вестник». Ніякіх парушэнняў нібыта пакуль не знайшлі.
Дзяржаўнае выданне паведамляе, што, па звестках дзіцячай паліклінікі, у хлопчыка не выявілі слядоў збіцця або цялесных пашкоджанняў на твары і руках. Была зафіксаваная толькі невялікая драпіна на лбе. Таксама былі вывучаныя запісы камер відэаназірання ў спартыўнай установе.
У дзень здарэння маці з сынам і трэнер былі запрошаныя ў Полацкі РАУС. Паводле вынікаў размовы, як паведамляецца, правапарушэнняў не ўстаноўлена, а бакі заявілі, што не маюць адзін да аднаго прэтэнзій.
Тым не менш, па факце здарэння ў спартыўнай школе працягваецца службовая праверка.
Раней у сацсетках з'явілася відэа маці траіх дзяцей і блогеркі Ганны Захаравай, якое за суткі сабрала дзясяткі тысяч праглядаў і тысячы каментароў на розных пляцоўках. У ім жанчына са слязьмі на вачах расказала, што ў Полацкай СДЮШАР яе сына Кліма збілі на трэніроўцы па дзюдо аднагрупнікі. Прычым — са згоды трэнера.
Каментары