Памятаеце беларускую супермадэль Марыну Лінчук? Цяпер яна ладзіць рэтрыты ў Коста-Рыцы ад $5250 за месца
Мінчанка Марына Лінчук была сярод топавых мадэляў свету ў нулявыя. Сёлета беларуская зорка Victoria’s Secret знайшла сябе ў новай працы.
39‑гадовая Лінчук апынулася ў мадэльнай справе, калі ёй было ўсяго 12 гадоў. Дзяўчынка прыйшла на кастынг у агенцтва «Тамара» за кампанію з сяброўкай, але выбралі тады якраз Марыну.
Далей была праца ў мадэльных агенцтвах Японіі і ЗША, а потым і галоўныя подыумы свету. У нулявыя Марына Лінчук некалькі разоў была тварам брэндаў Dior і Escada, удзельнічала ў паказах калекцый топавых брэндаў Chanel, Valentino, Gucci, Roberto Cavalli і шматлікіх іншых. Беларуска нават далучылася да «анёлаў» Victoria’s Secret — цягам некалькіх гадоў яна ўдзельнічала ў паказах гэтага культавага брэнда бялізны.
З цягам часу дзяўчына зацікавілася экалогіяй. Напрыклад, у пачатку 2017‑га Лінчук паехала на Мальдывы, каб разам з экалагічнай арганізацыяй Parley ачышчаць узбярэжжа ад смецця. Таксама Марына шмат гадоў захапляецца ёгай і сёрфінгам.
Цяпер Лінчук жыве ў ЗША і выхоўвае дзвюх дачок разам са шматгадовым партнёрам Браянам Кейсі. Мадэльную справу яна не закінула.
Напрыклад, у красавіку 2026‑га Лінчук і абедзве яе дачкі, Ганна-Сафія і Джыа, зняліся ў рэкламнай кампаніі пра мацярынства для сусветна вядомага амерыканскага брэнда Michael Kors. Сярод яе нядаўняй працы таксама здымкі для люксавага брэнда касметыкі для валасоў Oribe і маладога моднага брэнда Entire Studios.
Але ж беларуска знайшла і іншае захапленне. Яна выкарыстала сваю любоў да акіяна, ёгі і сёрфінга, і цяпер ладзіць люксавыя рэтрыты ў Коста-Рыцы проста на беразе Ціхага акіяна.
Лінчук распачала свой бізнэс у 2025-м. Некалькі гадоў таму ёй давялося шукаць спосаб перазагрузкі: як і многіх іншых жанчын, Марыну выматала неабходнасць сумяшчаць кар’еру, мацярынства і спробы захаваць ва ўсім гэтым уласную ідэнтычнасць.
Цяпер Лінчук прапануе іншым людзям рэтрыты ў Коста-Рыцы як спробу перазагрузіцца. Яе бліжэйшы рэтрыт адбудзецца на пляжы Плая-Эрмоса з 14 да 19 лістапада і збярэ, мяркуючы па іншых рэтрытах, не больш за 10—14 удзельнікаў — ці, што больш верагодна, удзельніц. Акрамя сёрфінга, гасцей чакаюць ёга, пілатэс, медытацыя і іншыя прыгоды, у тым ліку нават вячэрні паход да вадаспада.
Цэны ў Лінчук стартуюць ад $5250, і за гэтыя грошы можна атрымаць ложак у пакоі на дваіх з усімі пунктамі праграмы. А калі хочацца асобны пакой, за 6 дзён трэба будзе аддаць $7750. Мяркуючы па сайце рэтрыту, даехаць да Коста-Рыкі і да Кабана, маленькага аэрапорта недалёка ад месца рэтрыту, трэба будзе таксама за свой кошт.
Рэтрыты — зусім не ўнікальная з’ява для Коста-Рыкі. Напрыклад, проста цяпер можна зарэзерваваць сабе месца на сямідзённым рэтрыце з падобнай праграмай прыкладна за $4700.
«Наша Нiва» — бастыён беларушчыны
ПАДТРЫМАЦЬ
Каментары