Музычны стартап Grai з беларускімі каранямі набыў платформу сацыяльнага праслухоўвання музыкі Hangout. Яе стварылі аўтары сэрвісу Turntable.fm. Сума і іншыя ўмовы здзелкі не раскрываюцца, піша Office Life.
Кампанію Grai заснавалі беларусы Ілля Лясун, Дзмітрый Камароўскі і Андрэй Аўсевіч. Раней, з 2019 года, яны працавалі над дадаткам для рэдагавання відэа Vochi, які пазней набыў Pinterest. Цяпер Grai з дапамогай штучнага інтэлекту распрацоўвае і эксперыментуе з новымі музычнымі прадуктамі. У красавіку стартап прыцягнуў 9 мільёнаў даляраў інвестыцый.
Пасля набыцця Hangout Grai плануе падтрымліваць і развіваць партнёрскія сувязі, якія платформа ўжо наладзіла з музычнымі лэйбламі, выдавецтвамі і арганізацыямі калектыўнага кіравання аўтарскімі правамі. Кампаніі хочуць стварыць платформу новага пакалення для сацыяльнага музычнага стрымінгу.
Заснавальнік Hangout Джозэф Перл расказаў, што праект стваралі як спробу перанесці ў анлайн атмасферу сумеснага праслухоўвання музыкі. Ідэя заключалася ў тым, каб узнавіць сітуацыю, калі сябры сядзяць разам у пакоі, перадаюць адзін аднаму пласцінкі і слухаюць музыку як агульны досвед, а не проста індывідуальна ўключаюць кампазіцыі.
Сузаснавальнік Grai Андрэй Аўсевіч адзначыў, што музыка для яго заўсёды была звязаная з людзьмі, паколькі яго дзядуля спяваў у оперным тэатры. Паводле яго слоў, каманда Hangout паказала, наколькі моцна людзі хочуць аб’ядноўвацца вакол музыкі і не толькі націскаць кнопку «прайграць», але і больш актыўна ўзаемадзейнічаць з ёй. У Grai лічаць, што будучыня стрымінгу звязана з сацыяльным узаемадзеяннем і сумеснай творчасцю, а сучасныя тэхналогіі штучнага інтэлекту дазваляюць развіваць гэты кірунак.
У жніўні Grai стала адной з дзвюх першых кампаній, якія атрымалі ліцэнзію на патэнты Music IP Holdings. Яны рэгулююць выкарыстанне запісанай музыкі ў спалучэнні з тэхналогіямі штучнага інтэлекту — ад аўтарызацыі да ажыццяўлення выплат.
Публічны запуск Grai чакаецца ў найбліжэйшы час. Кампанія ўжо адкрыла запіс у спіс чакання.
35 маладых беларусаў і беларусак, за якімі варта сачыць: апублікаваны першы спіс Next 35
«Мы не ведаем, як дабіцца алайнмэнту такіх сістэм». Размовы пра пагрозы ШІ — змова OpenAI, Google і Anthropic?
Беларускі студэнт стварыў робапавука з функцыяй начнога бачання
Таццяна Зарэцкая збіралася выступаць на буйной канферэнцыі ў Саудаўскай Аравіі, а пасля знікла з раскладу
Памілаваныя 15 чалавек, сярод якіх 13 палітвязняў15
Каментары