Украінца, які ўчыніў разню ў каталіцкім кляштары ў Польшчы, змясцілі ў псіхіятрычную бальніцу
У Польшчы суд прызначыў трохмесячнае папярэдняе зняволенне 31‑гадоваму грамадзяніну Украіны Ігару М., якога падазраюць у нападзе з нажом на каталіцкі кляштар у Яраславе Падкарпацкага ваяводства, піша Polsat. У выніку нападу загінуў святар, яшчэ чацвёра чалавек былі параненыя.
Раённы суд у Яраславе ў суботу задаволіў хадайніцтва пракуратуры аб арышце падазраванага. Аднак мужчына будзе знаходзіцца пад арыштам ва ўмовах стацыянара. У пракуратуры паведамілі, што праз стан здароўя падазраванага яго не даставілі на судовае пасяджэнне.
Напярэдадні стала вядома, што мужчына знаходзіцца ў псіхіятрычнай медыцынскай установе. Судовыя псіхіятры выявілі ў яго прыкметы вострых шматформных псіхатычных расстройстваў. Паводле пракуратуры, у яго назіраюцца моцнае псіхоматорнае ўзбуджэнне, дэзарганізацыя мыслення і адсутнасць лагічнай сувязі. Эксперты лічаць, што цяпер ён не здольны ўдзельнічаць у судовых працэдурах і мае патрэбу ў лячэнні.
Пры гэтым заключэнне экспертаў тычыцца толькі цяперашняга псіхічнага стану Ігара М., а не яго стану ў момант нападу. Яго здольнасць усведамляць свае дзеянні падчас здарэння будзе ацэненая асобна.
Напад адбыўся раніцай 24 верасня на тэрыторыі Яраслаўскага абацтва на вуліцы Бенедыкцінскай. Украінец з нажом напаў на чатырох мужчын і адну жанчыну. Адзін са святароў загінуў, астатнія пацярпелыя атрымалі раненні.
Паводле польскай пракуратуры, перад нападам мужчына прыехаў у Польшчу з Германіі. Ён накіроўваўся да памежнага пераходу ва Украіну, але мяжу не перасёк. Пасля гэтага ён трапіў на тэрыторыю манастыра і зайшоў у кухонныя памяшканні, дзе, верагодна, сустрэў першых людзей, на якіх пазней напаў.
Польскія ўлады раней заявілі, што падазраванаму пагражае суровае пакаранне.
Цяпер чытаюць
Вячорка: Сустрэча Сікорскага з Рыжанковым можа ўдарыць па стаўленні да беларусаў у Еўропе23
Вячорка: Сустрэча Сікорскага з Рыжанковым можа ўдарыць па стаўленні да беларусаў у Еўропе
Басіст «Пятлі», яго 18‑гадовы сын і зорка «Разбітага сэрца пацана» — расказваем пра беларускамоўны гурт Prypiać, які прэзентаваў аўтарскую «Калыханку»1111
Каментары