29 студзеня на Сядзібе Партыі БНФ адбыўся чарговы з’езд моладзевага крыла АГП.
29 студзеня на Сядзібе Партыі БНФ адбыўся чарговы з’езд «Маладых дэмакратаў». Гэта моладзевае крыло Аб’яднанай грамадзянскай партыі.
Ад старэйшай арганізацыі на мерапрыемства прыйшлі намеснік старшыні АГП Леў Марголін і міжнародны сакратар партыі Андрэй Дзмітрыеў.
Галоўным пытаннем з’езду былі выбары новага старшыні.
Былы лідар Міхаіл Пашкевіч адмовіўся больш балатавацца на пасаду. Справа ў тым, што Міхась цяпер працуе ў Маскве і не здольны з адлегласці кіраваць арганізацыяй.
У справаздачах найбольшая спрэчка зайшла адносна нядаўняй выбарчай кампаніі. Не сакрэт, што частка сяброў «Маладых дэмакратаў» сышла працаваць на кампанію «Гавары праўду», а іншыя падтрымалі свайго партыйца Яраслава Раманчука. Гарачае абмеркаванне зводзілася да таго, ці не парушалі «някляеўцы» палажэнне аб няўдзеле ў камандах іншых кандыдатаў.
На пасаду старшыні вылучылася два чалавекі — кіраўнік штабу Раманчука па Мінску Алег Корбан і эканаміст Фёдар Масленікаў.
Прамова Корбана была дэталёва падрыхтаваная. Алег доўга тлумачыў свае крокі, калі будзе абраны на пасаду. Фёдар быў больш лаканічны. Ён прапанаваў засяродзіцца на пэўных пытаннях, якія магчыма вырашыць. Як, напрыклад, кругласутачнае метро ў Мінску.
Падлік галасоў зрабілі адкрытым.
Сябры «выбарчай камісіі» паказвалі прысутным кожны бюлетэнь і называлі прозвішча. У выніку за Корбана прагаласавала 35 чалавека, за Масленікава — толькі 15.
Алегу Корбану 25 гадоў. Ён мінчук. У нацыянальны рух прыйшоў у пятнаццацігадовым узросце. Скончыў машынабудаўнічы ліцэй. Потым навучаўся ў Міжнародным гуманітарным эканамічным інстытуце. Цяпер працягвае навучанне ў Кіеве.
У 2007 годзе Корбан прайшлоў праз крымінальную справу за ўдзел у незарэгістраванай арганізацыі — «Малады фронт». Атрымаў штраф.
Апошнім часам актыўны сябра АГП. Паспяхова правёў у Мінску кампаніі па зборы подпісаў за Яраслава Раманчука. Пасля выбараў быў арыштаваны і знаходзіўся ў ізалятары КДБ, але 7 студзеня быў адтуль вызвалены. Статус абвінавачанага з Корбана не зняты.
Алег кажа, што нават, калі апынецца зноў у турме, то паспее стварыць баяздольную каманду ў «Маладых дэмакратах», якая зможа працаваць і без яго.
Каментары