Рабы суслік — будучы сімвал Міра і Карэлічаў
Менавіта тут эколагі хочуць аднавіць папуляцыю рэдкіх звяркоў.
Менавіта тут эколагі хочуць аднавіць папуляцыю рэдкіх звяркоў.
Надзея з'явілася пасля таго, як у раёне выявілі каля 40 асобін знікаючых жывёл. Аказалася, што мясцовыя жыхары больш за 30 гадоў вядуць вайну з маленькім суслікам. Вяскоўцы лічаць яго шкоднікам і нішчаць рознымі спосабамі. Напрыклад, заліваюць норы вадой.
Галоўны эксперт па біяразнастайнасці праекта ПРААН/ГЭФ Міхаіл Максіменка патлумачыў прычыну такой нелюбові: у свой час суслікі моцна распладзіліся ў Карэліцкім раёне і сталі знішчаць пасевы збожжавых. Звярку абвясцілі «хімічную вайну». Норы апрацоўвалі сярністым вугляродам, ужываліся вострадзеючыя атрутныя сродкі: фасфід цынку, фторацэтамід, цыянід і стрыхнін.
— З-за актыўнага знішчэння раней вядомыя паселішчы суслікаў у Карэліцкім раёне апынуліся нежылымі. Аднак знойдзеныя на мінулым тыдні 40 асобін даюць шанец для аднаўлення гэтага віду на тэрыторыі раёна, — кажа Міхаіл Максіменка.
Арэал рабога сусліка ў Карэліцкім раёне — самыя паўночныя ў Еўропе. Як расказаў спецыяліст, звярка прыцягнулі наваколлі пасёлка Мір з-за пагорыстай мясцовасці, багатай глебы і пашавых угоддзяў. Аднак многія жыхары Карэлічы да гэтага часу не ведаюць, што рабога сусліка ў 2004 годзе занеслі ў Чырвоную Кнігу. У апошнія гады колькасць звыклых для вобласці жывёл значна паменшылася. Сёння спецыялісты не пакідаюць спробаў знайсці большую колькасць суслікаў ў Карэліцкім раёне.
— Каб выратаваць звярка, неабходны ўдзел мясцовых жыхароў. Нават простыя на першы погляд дзеянні — данясенне інфармацыі аб неабходнасці аховы сусліка да землекарыстальнікаў, усталяванне агароджаў і інфармацыйных знакаў каля нор — могуць стаць вырашальнымі ў справе захавання звярка, — кажа Міхаіл Максіменка.
Даведка «ВГ»
Суслік замацаваўся ў Беларусі на бязлесных раўнінах ў рэгіёнах з інтэнсіўным земляробствам. Любімыя месцы пасялення рабога сусліка — гэта выганы і пашы працяглага выкарыстання, сухія межы, абложныя лугі. Сёння рабы суслік уваходзіць у лік відаў, якія ахоўваюцца на міжнародным узроўні: звярка ахоўваюць у Чэхіі, Венгрыі, Польшчы, Малдове, Украіне і шэрагу іншых краін.
Дарэчы
Згодна з заканадаўствам Рэспублікі Беларусь, за незаконную здабычу рабога сусліка і разбурэнне яго нор накладаецца штраф у памеры ад 20 да 50 базавых велічынь для фізічных асоб і да 1 000 — для юрыдычных асоб.
У тэму
Праект ПРААН/ГЭФ «Інтэграцыя пытанняў захавання біяразнастайнасці ў палітыку і практыку тэрытарыяльнага планавання ў Беларусі» рэалізуецца ў нашай краіне з студзеня 2010 Нацыянальным выканаўчым агенцтвам праекта з'яўляецца Міністэрства прыродных рэсурсаў і аховы навакольнага асяроддзя Рэспублікі Беларусь.
Каментары