Z usioj krainy

Achviary lezuć na čyhunku

Štohod na čyhuncy hinuć dziasiatki dziaciej i darosłych. Vinavatyja amal zaŭsiody sami achviary. Tak, z pačatku hodu na aršanskim učastku čyhunki zafiksavana bolš za 20 pravaparušeńniaŭ.

Najbolš padobnych złačynstvaŭ zroblena na trasie Vorša—Tałačyn. Heta ŭ asnoŭnym kidańnie kamianioŭ pa ciahnikach dy elektryčkach. Kali dadać da chutkaści ciahnika ŭ 100—120 km/h chutkaść kinutaha kamienia vahoju 200—500 hramaŭ, dyk vyjdzie sukupnaja chutkaść 180—200 km/h. Nieadnojčy ad hetaha ciarpieli nia tolki šyby vahonaŭ, ale j sami pasažyry. Nijak nia vykaraniać i zvyčku kłaści na rejki roznyja pradmiety (biarviony, kamiani, žaleza). Šlach ciahnika pry ekstrannym tarmažeńni siahaje da 800 metraŭ. Paśla padobnych vypadkaŭ mašynisty vymušany lačycca ŭ medyka-reabilitacyjnych centrach — prytym što ŭ mašynisty nie biaruć ludziej ź nietryvałaj psychikaj. Vandalizmam na čyhuncy zajmajecca moładź ad 7 da 17 hadoŭ. Tamu j pakarańni im za ździejśnienaje zusim nievialikija, a čyhunka praciahvaje zastavacca zonaj pavyšanaj ryzyki.

Jaŭhien Žarnasiek, Vorša

Typovy intelihient

9 listapada ŭ Połacku na budynku haradzkoj palikliniki źjaviłasia memaryjalnaja doška ŭ honar vučonaha-bijachimika Jurja Astroŭskaha (1925—1992). Hety stvaralnik Instytutu bijachimii ŭ Horadni pačynaŭ navukovuju dziejnaść ŭ labaratoryi połackaj bolnicy. Va ŭračystaści ŭziali ŭdzieł pradstaŭniki Akademii navuk, kiraŭnictva horadu. Astroŭski viadomy i jak patryjot svajoj baćkaŭščyny, prychilnik nacyjanalnaha adradžeńnia, amatar biełaruskaj kultury i historyi. U 1980-ch jon byŭ adnym z kiraŭnikoŭ patryjatyčnaha klubu «Pachodnia». Ciapier jahonuju spravu — medyčnuju i nacyjanalnuju — praciahvaje jahony syn, prafesar Haradzienskaha medu.

Vasil Krokva, Połacak

«Sajuzdruk» pra Famu i Jaromu

Horacki žurnalist Eduard Brokaraŭ atrymaŭ pieršy adkaz na zaŭvahu z patrabavańniem uznavić prodaž u šapikach «Sajuzdruku» hazety «Narodnaja vola». Takija patrabavańni jon rehularna zapisvaje ŭ knihach zaŭvah kijoskaŭ, byvajučy ŭ roznych haradach. U Voršy kiraŭnik adździaleńnia «Sajuzdruku» adkazaŭ, što hazeta nie pradajecca pa ŭkazańni vyšejšaj arhanizacyi, ale jaje možna vypisać na pošcie. Ale ž hazeta vykinuta z padpisnoha katalohu na 2006 hod.

Horacki

Prezydencki hadzińnik spyniŭsia na 12-ci

Cikavy suvenir možna prydbać u adnoj z kramaŭ — hadzińnik z vyjavaj «usienarodnavybranaha». Napeŭna, pa zadumie jaho stvaralnika jon pavinien adličvać ščaślivy čas biełaruskaj stabilnaści. Ale čamuści ŭ handlovaj kropcy hadzińnik spyniŭsia. Pryčym strełki symbalična spynilisia na ličbach 10 i 2. U sumie — 12 hod. Moža heta nie vypadkova?

«Barmica», Hłybokaje

• 0
• 0
• 0
• 0
• 0
• 0
• 0
• 0