Pieramožca «Jeŭrabačańnia» pryjšła ŭ kamienty da Kirkorava, jaki prypisaŭ pieramohu i sabie
Rasijski śpiavak apublikavaŭ vialiki post, u jakim zajaviŭ, što na sioletnim konkursie «Jeŭrabačańnia» Bałharyja pieramahła dziakujučy jamu. Pieramožca konkursu Dara pryjšła ŭ kamienty da jaho dopisu i asprečyła jaho zajavy.
Svoj post Kirkoraŭ prailustravaŭ vyjavaj trajanskaha kania sa svaim tvaram. Jon zajaviŭ, što Bałharyja šeść hadoŭ nie ŭdzielničała z-za niedachopu srodkaŭ u jaje hramadskaha teleradyjopieradatara BNT. Tamu ŭ 2025 hodzie jon, nibyta, paznajomiŭsia z hiendyrektaram teleradyjopieradatara Emiłam Kašłukovym i znajšoŭ nienazvanaha inviestara, jaki apłaciŭ udzieł Bałharyi, piša «Hramadskaje» sa spasyłkaj na bałharskaje vydańnie Standart.
Taksama, pa jaho słovach, da bałharskaha vystupu nibyta pryčyniłasia i jaho pradziusarskaja kampanija Dream Team, jakaja praz pradziusara Iliasa Kakotasa i kampazitara Dzimitrysa Kantopułasa padrychtavała śpiavačku Dara.
«Bałharyja — radzima majho baćki, i mienavita siońnia, u dzień naradžeńnia taty, ja vyrašyŭ zakryć dla siabie hieštalt «Jeŭrabačańnia». Maralna ja zadavoleny. Ja vyjhraŭ hety konkurs», — napisaŭ Kirkoraŭ.
Dara asprečyła ŭdzieł rasijskaha śpiavaka ŭ jaje pieramozie. Siarod tych, chto dapamoh joj, śpiavačka adznačyła svoj łejbł Virginia Records, hramadskaha teleradyjopieradatara BNT i mižnarodnych pradziusaraŭ.
«Z usioj pavahaj, ale Bangaranga była napisanaja ŭ 2023 hodzie ŭ Safijskim piesiennym łahiery», — napisała śpiavačka.
Čutki pra ŭdzieł Kirkorava ŭ vystupie Bałharyi raspaŭsiudžvalisia i raniej, adnak heta ŭpieršyniu, kali sama śpiavačka aficyjna adreahavała na ich.
Ciapier čytajuć
Palitviazień Kim Samusienka paraŭnaŭ śviet na momanty jaho pasadki i vyzvaleńnia: Usio niadrenna dla jeŭrapiejskaj cyvilizacyi, a značyć, i dla biełarusaŭ2323
Kamientary