U Vialikabrytanii abjavili hałasavańnie za žyvioł na budučych banknotach dla funtaŭ
U Vialikabrytanii na novych banknotach mohuć źjavicca vyjavy tupikoŭ, delfinaŭ, čmialoŭ i inšych pradstaŭnikoŭ miascovaj faŭny. Bank Anhlii apublikavaŭ karotki śpis žyvioł, ź jakich hramadzianie zmohuć vybrać budučyja simvały dla banknot naminałam 5, 10, 20 i 50 funtaŭ, piša vydańnie The Guardian.
Rašeńnie vyklikała dyskusii ŭ palityčnych kołach. Niekatoryja krytyki śćviardžali, što novyja vyjavy zamieniać viadomych histaryčnych asobaŭ, takich, naprykład, jak palityk Uinstan Čerčyl, piśmieńnica Džejn Ościn i matematyk Ałan Ćjurynh. Adnak u Banku Anhlii padkreślivajuć, što hałoŭnaja meta abnaŭleńnia — ukaranieńnie novych elemientaŭ biaśpieki dla baraćby z padrobkami.
U śpis dla hałasavańnia ŭvajšli tolki tyja vidy žyvioł, jakija sustrakajucca ŭ Vialikabrytanii. Siarod ich — delfiny-afaliny, ryžyja lisy, jeŭrapiejskija vožyki, tupiki, a taksama šerah redkich vidaŭ, u tym liku atłantyčny łasoś i niekatoryja matyli.
Žyvioły padzielenyja na try hrupy: sysuny, ptuški i inšyja pradstaŭniki žyviolnaha śvietu — ryby, nasiakomyja i ziemnavodnyja. Kožny ŭdzielnik hałasavańnia moža vybrać da dvuch varyjantaŭ u kožnaj katehoryi. Apytańnie budzie doŭžycca da 3 lipienia.
U Banku Anhlii adznačajuć, što dzikaja pryroda stała samaj papularnaj temaj padčas papiaredniaha hramadskaha abmierkavańnia. Pry hetym kančatkovy vybar budzie zaležać nie tolki ad kolkaści hałasoŭ, ale i ad taho, nakolki vyrazna buduć adroźnivacca vyjavy na roznych naminałach banknot.
Čakajecca, što raspracoŭka i testavańnie novych kupiur zojmuć jašče niekalki hadoŭ, tamu jany źjaviacca ŭ abaračeńni nie adrazu. U Banku Anhlii ličać, što novyja banknoty dapamohuć nie tolki pavysić uzrovień abarony ad padrobak, ale i padkreślić bahaćcie brytanskaj pryrody.
Kamientary
dziela hetaha moža rabić samyja brudnyja kroki
Bo jeŭrapiejskaja vaviorka ŭ Brytanii amal zhinuła praz zaviezienuju amierykanskuju šeruju vaviorku. Iranična.