Kalarovyja revalucyi adasablajuć respubliki byłoha Sajuzu ad Rasiei, sajuznyja damovy, naadvarot, zaciahvajuć u koła intaresaŭ Maskvy. U minuły paniadziełak źjaviŭsia novy braterski sajuz — ciapier Rasiei z Uzbekistanam.
Sajuznaja damova pazbaŭlaje ŭzbecki režym ad chvalavańniaŭ, što paŭstali jak u samoj krainie, tak i za jaje miežami. Zamiest amerykanskich vojskaŭ va Ŭzbekistan ujeduć rasiejskija tanki, pa krainie buduć stvorany rasiejskija vajskovyja bazy. Zhodna z padpisanaj damovaj, hetyja vojski pavinny baranić režym Karymava, kali nad tym naviśnie pahroza. Nu amal jak za časami Rečy Paspalitaj.
Paśla padpisańnia damovy U.Pucin skazaŭ, što dakument «vyvodzić našy krainy na pryncypova novuju jakaść i maksymalna blizkuju stupień uzajemadziejańnia». Uzajemadziejańnia z krainaj, jakuju ličać izhojem va ŭsim cyvilizavanym śviecie. Eŭraźviaz užo pryniaŭ pastanovu ab zabaronie pastavak zbroi va Ŭzbekistan.
Dziakujučy travieńskim padziejam u Andyžanie Rasieja zachavała ŭpłyŭ u Centralnaj Azii. Adnak, jak miarkujuć rasiejskija analityki, ciapier Rasieja moža być uciahnuta ŭ zadušeńnie narodnych paŭstańniaŭ na abšarach Uzbekistanu. Što z hetaha stajecca, viedaje biełaruskaja historyja. Karol Rečy Paspalitaj Aŭhust II Mocny, zmahajučysia z apanentami, dazvoliŭ raźmiaścicca na terytoryi krainy rasiejskamu vojsku.
«Prysutnaść rasiejskaha vojska budzie stabilizujučym faktaram, jaki źmiakčyć unutranaje napružańnie, što isnuje va Ŭzbekistanie», — ličyć čalec kamitetu Dziarždumy pa suviaziach z SND Kanstancin Zatulin. Jak, kali amerykanskaja prysutnaść takoha źmiakčeńnia prynieści nia zdoleła?
Dla ŭsiaho śvietu robicca zrazumiełaj pazycyja Maskvy, što dasiul padtrymlivaje režym u našaj krainie, a ciapier, karystajučysia vypadkam, padstaŭlaje plačo, a mo stavić nahu i na ŭzbeckaha tyrana.
Kamientary