Snapkoŭ: Biełarusi pahražaje rezki rost zamiežnaha doŭhu i devalvacyja
Minekanomiki prahnazuje rezki rost zamiežnaj zapazyčanaści Biełarusi ŭ 2013 hodzie. Jana moža vyraści na 5 miljardaŭ dalaraŭ da $41,6 młrd.
Takija ličby byli ahučanyja ŭ dakładzie ministra ekanomiki RB Mikałaja Snapkova na pasiadžeńni Saŭmina 13 lutaha.
«Raźliki pakazvajuć, što va ŭmovach „kłasičnaha“ vykarystańnia dziaržaŭnaj padtrymki dziejańni pradpryjemstvaŭ nakiroŭvajucca nie na raźvićcio, a na asvajeńnie srodkaŭ. Užo siońnia na praviadzieńnie madernizacyi dadatkova zajaŭlena 3,5 młrd. dalaraŭ ZŠA inviestycyj…», — havorycca ŭ tekście dakłada.
«U vyniku źniešniaja dziaržaŭnaja pazyka moža vyraści da 17 młrd dalaraŭ ZŠA (z 12 młrd). Takim čynam, suadnosiny zamiežnaj dziaržaŭnaj zapazyčanaści da VUP składuć 22,7% i nabliziacca da parohavaha značeńnia biaśpieki 25%», — adznačajecca ŭ dakumiencie.
«Adpaviedna, uzrastaje i pakazčyk vałavoj zamiežnaj zapazyčanaści. U suviazi z hetym, navat u vypadku spryjalnaj dynamiki ekanamičnaha raźvićcia ŭ krainach, jakija našy asnoŭnyja handlovyja partniory,
vałavaja zamiežnaja zapazyčanaść pa vynikach 2013 hoda moža skłaści paradku 41,6 młrd dalaraŭ ZŠA (zamiest 34,8 młrd na 1 studzienia 2013 hoda) i pieravysić parohavaje značeńnie biaśpieki (55,3% VUP pry parohavym značeńni 55%)», — papiaredžvaje Minekanomiki RB.
Viedamstva taksama pradkazvaje, što ŭ 2013 hodzie madernizacyja stanie pryčynaj inviestycyjnaha impartu na sumu nie mieniej za 1,6 młrd dalaraŭ.
«Uźnikły razryŭ finansavańnia płaciežnaha bałansu moža być kampiensavany albo za košt źnižeńnia zołatavalutnych reziervaŭ, albo za košt devalvacyi nacyjanalnaj valuty», — papiaredžvaje Minekanomiki.
«Finansavańnie za košt devalvacyi nacyjanalnaj valuty, jak nam viadoma, viadzie da paskareńnia inflacyi, śpiekulatyŭnaha popytu na valutu, rostu adsotkavych stavak rostu doli prablemnych aktyvaŭ», — kanstatavaŭ ministr u svaim dakładzie.
Kamientary