Dziesiać hiejaŭ, jakija źmianili sučasnuju muzyku — videa

Siońnia dzień baraćby z hamafobijaj – «Naša Niva» prapanuje vam padborku pieśniaŭ ad aŭtaraŭ nietradycyjnaj aryjentacyi, jakija źmianili sučasnuju muzyku.

Ełtan Džon – Skyline Pigeon

Tvorčaść Ełtana Džona moža słužyć svajeasablivym padručnikam pa tym, jak stvarać sapraŭdy vysokakłasnuju papularnuju muzyku. Darečy, mienavita Ełtan Džon byŭ pieršym suśvietnaviadomym papularnym muzykam, jaki ŭ 1979 naviedaŭ Saviecki Sajuz. Apošni albom Ełtana Džona vyjšaŭ u 2010 hodzie i staŭ adnym z najłpiešych relizaŭ hoda. Ełtan Džon aficyjna ŭziaŭ šlub sa svaim siabram Devidam Fiernišam.

Queen – Don't Stop me Now

Fredzi Merkjury staŭ adnoj z samych jaskravych fihur suśvietnaj rok-muzyki – albom The Night in the Opera dahetul ličycca adnoj z važniejšych kružełak 1970-ch. Svaju nietradycyjnuju aryjentacyju Merkjury nikoli nie chavaŭ – bolej za toje, nazva hurta pachodzić ad mianuški Merkjury.

Litł Ryčard – Tutti Frutti

Aŭtar pałovy kłasičnych rok-n-rołaŭ, takich jak Tutti Frutti, Long Tall Sally, Keep a-Knockin' Litł Ryčard byŭ chiba što pieršym pradstaŭnikom papularnaj muzyki, jaki adkryta zajaviŭ pra svaju nietradycyjnuju aryjentacyju, što dla siaredziny XX stahodździa było bolš čym prosta śmiełym učynkam.

Daści Sprynhfiłd – Son of a Preacher Man

Adna z samych pryhožych śpiavačak, Daści Sprynhfiłd, čyj niepaŭtorny hołas staŭ simvałam pop-muzyki Memfisa i vakolicaŭ, nikoli nie afišavała svaju luboŭ da žančyn. Tym nie mienš, jaje ramantyčnyja stasunki sa śpiavačkaj Normaj Teneha abraśli lehiendami.

Łu Ryd – Walk on the Wil Side

Lidar The Velvet Unerground i adzin z asnoŭnych paetaŭ u historyi rok-muzyki Łu Ryd nikoli nie chavaŭ svaju biseksualnaść, bolej za toje, jon napisaŭ z tuzin ramantyčnych pieśniaŭ pra svaje stasunki ź piersanažami roznaha poła, jakija dahetul hučać jak nievialikija šedeŭry. Pra pieśniu Walk on the Wild Side Ryd kazaŭ: «Kali b na radyjo zdahadvalisia pra što jana, to nie dakranulisia b da jaje navat čapiałoj».

R.E.M. – Orange Crush

Majkł Stajp, lidar hurtu R.E.M., staŭ adnym ź lepšych aŭtaraŭ pieśniaŭ apošnich tryccaci hod. Mienavita jamu naležać takija suśvietnyja chity jak Losing My Religion, Everybody Hurts i Man on the Moon. Pra svaju aryjentacyju Majkł Stajp zajaviŭ takim čynam: «Ja nie homaseksuał, ja nie hieteraseksuał, ja prosta seksuał».

Rufus Uejnrajt - Cigarettes & Chocolate Milk

Rufus Uejnrajt, muzyka ŭ trecim pakaleńni, staŭ adnym z tych, chto na pačatku 2000-‘ adradziŭ stylovyju pop-muzyku, jakaja spałučała ŭ sabie i tradycyi sinhier-sanhrajteraŭ i kabare 30-ch hadoŭ. U 2010 jon ažaniŭsia sa svaim siabram Jornam Uejsbrotam, chacia da sustrečy ź im, pa ŭłasnych słovach, nie byŭ vialikim prychilnikam hiej-viasiellaŭ.

Sigur Ros - Hoppippola

Isłandyski post-rok hurt Sigur Ros nazaŭždy źmianiŭ łandšaft suśvietnaj muzyki – usie čatyry albomy hurtu stali kultavymi. Vakalist Joŭn Toŭr Birhisan zaŭždy byŭ adkrytym homaseksualistam.

Placebo – Every You Every Me

Lidar Placebo – hurtu, jaki jašče niadaŭna akupiravaŭ usie muzyčnyja kanały, Brajan Mołka, aŭtar pary tuzinoŭ pieśniaŭ, jakija stali kłasikaj siaredziny dzievianostych, adkryta kazaŭ pra svaju biseksualnaść, što nie pieraškadžaje jamu mieć ščaślivy šlub z fatohrafam Chelenaj Bierh.

Antony & The Johnsons – Hope there's Someone

Entani Chahierci – lubimiec ńju-jorkskaj bahiemy, jaki ličycca adnym z samych cikavych sučasnych elitarnych artystaŭ, nie tolki pryznaje svaju nietradycyjnuju aryjentacyju, ale i epaciruje publiku pieśniami kštałtu I'm in Love with the Dead Boy.

• 0
• 0
• 0
• 0
• 0
• 1
• 0
• 0