Zamianiŭ Staravojtava, zhańbiŭsia ŭ PARIE: piać faktaŭ pra Valeryja Ivanova

«Rasśviet»

Uradženiec klimavickaj vioski Papiechniki Valeryj Ivanoŭ pieršuju adukacyju atrymaŭ u Horackaj sielskahaspadarčaj akademii. Viadoma, daviałosia papracavać u hetaj śfiery. Spačatku ŭ kałhasie «Kastryčnik» Kruhlanskaha rajona. A paśla — nie aby-dzie — u kałhasie «Rasśviet» Kiraŭskaha rajona.

Haspadarku Ivanoŭ uznačaliŭ akurat paśla taho, jak kryminalnaja sprava była zaviedzienaja na Hieroja sacyjalistyčnaj pracy, lehiendarnaha staršyniu «Rasśvieta» Vasila Staravojtava. Tuju spravu mnohija ličyli i ličać palityčna matyvavanaj.

Škłoŭ i falsifikacyi

Paśla Ivanova pryznačajuć znoŭ nie aby-kudy, a staršynioj Škłoŭskaha rajvykankama. Praŭda, pierad hetym pakiravaŭ jašče Klimavickim rajvykankamam. Da radzimaj Łukašenki ŭvahi zaŭsiody samaja pilnaja.

U 2008 hodzie Ivanoŭ «abirajecca» ŭ deputaty pałaty pradstaŭnikoŭ. Jahonym kankurentam pa škłoŭskaj akruzie byŭ pradstaŭnik Partyi BNF Ryhor Kastusioŭ. Dyk voś naziralnikam Kastusiova ŭdałosia vyjavić i sfatahrafavać pustyja pratakoły, jakija ŭžo byli padpisanyja siabrami vybarčaj kamisii. Skandał? Nie, pieravybaraŭ na Škłoŭščynie nie rabili, Ivanovu addali pieramohu.

Zhańbiŭsia ŭ Radzie Jeŭropy

U pałacie pradstaŭnikoŭ spadar Ivanoŭ byŭ vice-śpikieram. Niaredka jaho adpraŭlali ŭ zamiežnyja kamandziroŭki. Tak u 2009 h. jon vystupaŭ u Radzie Jeŭropy ŭ Strasburzie. Cikava, što padčas svajho vystupu Valeryj Ivanoŭ nie ŭstaŭ ź miesca, a pramaŭlaŭ siedziačy. Tady kazali, što ledź nie pieršy taki vypadak. Havoryć Ivanoŭ pa-rasiejsku z vyraznym ćviordym biełaruskim «č». Pamiatajecca, što aŭtaru hetych radkoŭ tak i atrymałasia tady paśla pasiadžeńnia parazmaŭlać sa spadarom Ivanovym. Kuratar z aficyjnaj delehacyi ŭsio dziorhaŭ parłamientara: «Nam para».

Havaryŭ ab prypiskach

U parłamiencie Ivanoŭ prabyŭ niadoŭhi čas. Jahonyja ŭmieńni spatrebilisia va ŭradzie. Jon staŭ vice-premjeram, adkazvaŭ za sielskuju haspadarku. Na adnoj z kalehij Minsielhaspradu jon skazaŭ, što prypiski ŭ krainie paŭsiul.

Ivanoŭ zaklikaŭ zmahacca z hetaj zahannaj źjavaj. Prypiski źnikli? Kaniečnie, nie.

Budučy ž jašče deputatam Ivanoŭ prajaviŭ siabie jak zmahar z pjanstvam siarod niepaŭnaletnich.

«Biełaruskaja kalijnaja kampanija»

Mienavita tam apošni hod adpracavaŭ Valeryj Ivanoŭ. Za hety čas jon absalutna ničym nie zapomniŭsia.

U ŚMI jaho proźvišča pačynała fihuravać tolki ŭ suviazi z dakładami ŭ Łukašenki, a taksama z kantraktami na pastaŭki kalija ŭ Indyju i Kitaj.

• 0
• 0
• 0
• 0
• 0
• 0
• 0
• 0