Miljard za žyćcio Julii Kubaravaj: heta mnoha ci mała?
Sud pa spravie ab hibieli dziaŭčyny na apieracyi ŭ «Ekamiedsiervisie» byŭ rezanansny. Upieršyniu hramadstva źviarnuła takuju ŭvahu na jakaść pryvatnaj miedycyny.
Upieršyniu atrymali rozhałas fakty, a nie ŭražańni pra rvactva niekatorych daktaroŭ-pryvatnikaŭ. I poŭnuju adsutnaść naležnaha dziaržaŭnaha kantrolu jakaści ŭ hetaj śfiery.
Jak, darečy, i ŭ inšych śfierach, dzie panuje nierehulavany kapitalizm — naprykład, u budaŭnictvie, vytvorčaści budmateryjałaŭ ci restarannaj śfiery.
Biesprecedentnaj stała i suma maralnaj kampiensacyi, jakuju pa rašeńni suda pavinien spłacić baćkam pamierłaj dziaŭčyny «Ekamiedservis». Heta 75 miljonaŭ rubloŭ u jakaści kampiensacyi materyjalnaj škody i 1 miljard rubloŭ — u jakaści maralnaj. Usiaho kala 115 tysiač dalaraŭ.
Tym nie mienš, sud u 10 razoŭ źniziŭ sumu kampiensacyi proci zajaŭlenaj baćkami ŭ pazovie.
Tak, u demakratyčnych krainach Zachadu časta ŭ anałahičnych situacyjach hetyja sumy jašče bolšyja. Ale tam i inšaja tradycyja staŭleńnia da žyćcia dy bolšyja zarobki.
Dla paraŭnańnia: kali hod tamu kiroŭca na «Porše Kajenie» źbiŭ školnika na pryškolnaj darozie, jon pieradaŭ da suda ŭ jakaści maralnaj kampiensacyi 200 miljonaŭ rubloŭ, i siamja hetym abmiežavałasia.
Ź inšaha boku: a ci moža heta suma być precedentam, kali havorka idzie pra pamyłki ŭ dziaržaŭnych balnicach ci paliklinikach?
Adzinaja dačka, niaviesta (da viasiella zastavaŭsia miesiac), 23-hadovaja Julija Kubarava vyrašyła zrabić rynapłastyku — vypravić formu nosa. Paśla apieracyi ŭ krasaviku dziaŭčyna tak i nie pryjšła ŭ prytomnaść. Aparat pa padačy kisłarodu byŭ niaspraŭny, inžynier i anestezijołah nie zvažali na heta. Da čaho dajšło: dzirka ŭ šłanhu ŭ im była paprostu zamatana skotčam, i tak praviali niamała apieracyj.
Mama Julii Kubaravaj skazała žurnalistam na pracesie: «My navažylisia padać hety pazoŭ, bo chacieli pakazać ludziam, što treba nie bajacca iści da kanca. Kab našy ludzi pavažali siabie i šanavali čałaviečaje žyćcio: jaho nielha zamianić nijakimi hrašyma».
Baćki Kubaravaj chočuć usynavić dzicia, kali daść zdaroŭje: «Heta, viadoma ž, nie zamienić nam Juli, ale ŭ žyćci budzie choć niejkaja meta».
Pastanova plenuma Viarchoŭnaha suda Biełarusi ad 28 vieraśnia 2000 hoda №7 «Ab praktycy prymianieńnia sudami zakanadaŭstva, jakoje rehuluje kampiensacyju maralnaj škody» kaža: «Pry vyznačeńni pamieraŭ kampiensacyi … sudu musova kiravacca č. 2 art. 152 i p. 2 art. 970 HK. Pry hetym dziela zabieśpiačeńnia patrabavańniaŭ razumnaści i spraviadlivaści dla kožnaha kankretnaha vypadku sudu treba ŭličvać stupień maralnych i fizičnych pakutaŭ paciarpiełaha …. Sud upravie taksama ŭličvać majomasny … stan taho, chto ŭčyniŭ škodu».
Navat kali havorka pra pierałom, vyznačyć pamier kampiensacyi byvaje ciažka. A jak acanić, kryj Boža, žyćcio?
Jak vy ličycie, ci spraviadliva, što ŭ padobnych vypadkach vinavaty bok vypłačvaje kampiensacyju za maralnuju škodu? Ci canu žyćcia ŭsio adno nie vymierać hrašyma, a niahodnika karajuć turma i dola? Ci kampiensacyja pavinna być mienšaj, bolšaj? Jak, zychodziačy z čaho jana pavinna vymiaracca? Pišycie ŭ kamientach.
Kamientary