Dziejačy kultury vykazali padtrymku aryštavanym fanatam BATE FOTA
Jany vyrabili raściažki, anałahičnyja tym, ź jakimi sfatahrafavalisia 23 fany BATE ŭ Barysavie. Akramia taho, tvorcy trymali płakat «Fanaty BATE — małajcy».
Udzieł uziali piśmieńniki Natałka Babina, Michaś Skobła, Słavamir Adamovič, śpievaki Lavon Volski i Źmicier Vajciuškievič, džazmen Pavieł Arakielan, kinascenaryst Andrej Kurejčyk, bard Andrej Mielnikaŭ, kinarežysiory Volha Mikałajčyk i Aleh Daškievič, mastak Michał Aniempadystaŭ, teatralny režysior Valer Mazynski, historyki Anatol Sidarevič, Aleś Paškievič i Aleh Hardzijenka, veb-dyzajnier Staś Karpaŭ, vieteran biełaruskaj žurnalistyki Siarhiej Vahanaŭ dy inšyja.
Varta adznačyć, što inicyjatyvu zdymańnia šyroka nie razhałošvali, kab sprava nie sarvałasia.
«Heta prosty žest čałaviečaj salidarnaści, — kaža aŭtarka ramana «Rybin horad» Natalla Babina.
—Ja padtrymlivaju łozunhi, ź jakimi vyjšli barysaŭskija chłopcy. I spačuvaju chłopcam, i zachaplajusia imi».
«Pa-pieršaje, ja fanat BATE, — tłumačyć scenaryst «Jołak», «Lubovi-markovi» i «Vyšej za nieba» Andrej Kurejčyk. — Pa-druhoje, ja jak juryst pa pieršaj adukacyi mahu skazać, što toje, jak pravodziacca sudy ŭ našaj krainie — heta hańba.
Sudzić ludziej postfaktum, pa fota, praz trecija ruki — tak nie moža być prosta. Pa-treciaje, ludzi majuć prava padtrymlivać toje, što im padabajecca», — kaža Kurejčyk.
Represij nie baiciesia? «Ja hatovy da ich, navat pašpart z saboj uziaŭ», — žartuje kultavy rokier Lavon Volski.
«Mnie balić za Ukrainu, a hetaje fota — dobry sposab vykazać svaju zaniepakojenaść, abureńnie,
— tłumačyć aŭtar «Narodnaha alboma» Michał Aniempadystaŭ. — I toje, što adbyłosia z chłopcami z Barysava, jakija sfatahrafavalisia – heta nie pa-ludsku.
Ja dapuskaju, što za našuju akcyju mohuć być niejkija sankcyi. Škada było b zhubić čas, kali trapiš na 10—15 sutak. Ale kali prymaješ rašeńnie, stanovicca nie tak strašna».
Nahadajem, što 26 studzienia 23 chłopcy ŭ Barysavie źnialisia z płakatami «Ukraina, my z taboj», «Hierojam słava».
U rukach jany taksama trymali bieł-čyrvona-bieły ściah. Tak jany vykazali salidarnaść z ukrainskimi majdanami, u jakich čynny ŭdzieł biaruć akurat ultras.
Barysaŭskaja milicyja raspačała pošuk udzielnikaŭ akcyi. Dva chłopcy adbyli administratyŭny aryšt za svaju salidarnaść z Ukrainaj. Astatnija — u vyšuku.
Represii suprać barysaŭcaŭ vyklikali abureńnie ŭ fanackich asiarodkach.
Kamientary