Ukrainskaha žurnalista aryštavali ŭ Rasii pa abvinavačvańni ŭ špijanažy
U Maskvie zatrymany karespandent infarmacyjnaha ahienctva Ukrinfarm Raman Suščanka.
Ukrinfarm — heta anałah biełaruskaha ahienctva BiełTA, dziaržaŭnaje infarmacyjnaje ahienctva.
Pra aryšt stała viadoma 2 kastryčnika, kali infarmacyju pra Suščanku vypadkova atrymali maskoŭskija pravaabaroncy. Sam jon nie vychodziŭ na suviaź z 30 vieraśnia.
Suščanka pracavaŭ karespandentam Ukrinfarma ŭ Francyi.
Lefortaŭski sud Maskvy aryštavaŭ Suščanku pa abvinavačvańni ŭ «špijanažy» pa art. 276 KK RF.
47-hadovy Suščanka siadzić u kamiery karancinnaha adździaleńnia turmy Lefortava ŭ Maskvie.
«Suščanka paviedamiŭ pravaabaroncam, što pry zatrymańni na jaho akazvali psichałahičny cisk, śledčy nie dazvoliŭ jamu patelefanavać dadomu i paviedamić žoncy pra svoj aryšt. Śledstva FSB dało jamu dziaržaŭnaha advakata. Ukrainski konsuł užo paćvierdziŭ infarmacyju ab aryšcie hetaha žurnalista ŭ Rasii», — raskazali pravaabaroncy.
U turmach Rasii adbyvajuć pakarańnie za špijanaž na karyść Ukrainy Valancin Vyhoŭski, asudžany na 14 hadoŭ, i Viktar Ščur, asudžany na 12 hadoŭ. Akramia taho, u turmach utrymlivajecca hrupa ŭkraincaŭ — hramadzianie Ukrainy i Rasii, jakich vinavaciać u padrychtoŭcy aktaŭ sabatažu ŭ Krymie. Źniavolenyja i dziasiatki krymskich tataraŭ, jakija nie pryznali dałučeńnia paŭvostrava da Rasii i zastajucca viernymi ŭkrainskaj dziaržavie.
Ahienctva Ukrinfarm nazvała zatrymańnie Suščanki «spłanavanaj pravakacyjaj».
Ciapier čytajuć
Kryk dušy Biaspałava pra Cichanoŭskaha: Jon pieratvarajecca ŭ Łukašenku 2.0, heta trajanski koń52
Kamientary