U Minsku zatrymany adept «ruskaha śvietu», vykładčyk BDUIR Juryj Paŭłaviec
Sajt «Biełaruski partyzan» apublikavaŭ infarmacyju, što 6 śniežnia byŭ zatrymany historyk Juryj Paŭłaviec.
Jon pracavaŭ dacentam kafiedry humanitarnych dyscyplin u Biełaruskim dziaržaŭnym univiersitecie infarmatyki i radyjoelektroniki (BDUIR), rodam z Žodzina. 37-hadovy Paŭłaviec adznačaŭsia radykalnymi prarasijskimi pohladami.
Juryj Paŭłaviec źjaŭlaŭsia aŭtaram takich šmatlikich rasijskich sajtaŭ, jak «Rehnum», «Zapadnaja Ruś», «Ruspraŭda», eadaily.com.
Niaredka Juryj Paŭłaviec krytykavaŭ biełaruskija ŭłady za toje, što jany spryjajuć «nacyjanalizmu» ŭnutry krainy, a taksama hatovyja pradać krainu ŭ abmien na zachodnija kredyty.
Pa niepaćvierdžanaj infarmacyi, jaho abvinavačvajuć pa artykule 130 Kryminalnaha kodeksa Biełarusi «Raspalvańnie mižnacyjanalnaj varožaści».
Načalnik adździeła infarmacyi i suviazi z hramadskaściu Siarhiej Kabakovič paviedamiŭ «NN», što na dadzieny momant nie moža ni paćvierdzić, ni abvierhnuć hetuju infarmacyju, viadziecca raźbiralnictva.
U BDUIRy nie vałodajuć infarmacyjaj, ci zatrymany spadar Paŭłaviec.
«Naša Niva» budzie sačyć za hetaj spravaj.
Kamientary