U Breście kaścioł pieratvaryli ŭ kancertnuju zału. Kvitki raskuplajuć za chviliny, ale vierniki nie ŭ zachapleńni

Papiarednija kancerty prachodzili 24 i 25 žniŭnia, a nastupnyja abvieščanyja na 11 i 12 vieraśnia. Raniej cana na kvitki była 55‑65 rubloŭ, a ciapier jaje pavysili da 75-80. Tym nie mienš, usio raskupili imhnienna. Litaralna praź niekalki chvilin paśla publikacyi spasyłki na servis kupli kvitkoŭ abviaścili Sold out.

Muzyki vystupajuć sa śvietłavymi efiektami, prytancoŭvajuć i znachodziacca prosta ŭ ałtarnaj častcy chrama, niekatoryja — za ałtarom. Muzyki vykonvajuć suśvietnyja chity ŭ aŭtarskich aranžyroŭkach. Heta nie tyja zvykłyja kancerty kłasičnaj muzyki, jakija časta pravodziacca ŭ chramach, i heta vyklikała nierazumieńnie ŭ mnohich viernikaŭ, jakija ličać toje, što adbyvajecca ŭ Breście, niebiaśpiečnaj źjavaj.

Katolik.life sabrała mierkavańni pra hetyja dziŭnyja kancerty. Pry hetym na pieršapačatkovuju nie zaŭsiody pazityŭnuju reakcyju viernikaŭ dahetul tak i nie pastupiła jakich-niebudź tłumačeńniaŭ z boku duchavienstva. Tamu jany zadajucca pytańniami, na jakija čakajuć adkazaŭ.

Hałoŭnaje ź ich: ci nie źjaŭlajucca takija kamiercyjnyja kancerty pop-muzyki desakralizacyjaj chrama?

U dyskusijach častka viernikaŭ padtrymlivaje ideju z kancertami i ciešycca tamu, što dziakujučy im u chram prychodziać sotni dalokich ad chryścijanstva ludziej, nazyvajuć heta «jevanhielizacyjaj sučasnych jazyčnikaŭ».

Ale inšyja adkazvajuć na heta tak: ludziej pryvodziać nie da Boha, a na ŭłasnaje šou, na kancertach nie hučyć propaviedź Jevanhiella, ale kultyvujecca «atmaśfiernaść», estetyka i pačućciovaść — dušeŭnaść zamiest duchoŭnaści.

Praktyka pakazvaje, što naviedvalniki navat duchoŭnych arhannych kancertaŭ u kaściołach u bolšaści tak i zastajucca tolki naviedvalnikami kancertaŭ: jany nie stanoviacca parafijanami chramaŭ. Bolš za toje: u takich ludziej uźnikaje ŭsprymańnie chrama nie jak sakralnaha miesca, dzie ździajśniajecca achviara Chrysta, a jak niejkaj kulturnaj ustanovy.

Naviedvalniki kancertaŭ, adnak, adznačajuć, što hałoŭny salist prajekta Jahor Šarankoŭ źjaŭlajecca katalickim viernikam i padčas kancertaŭ vystupaje z karotkimi vykazvańniami, jakija niekatoryja ličać «propaviedziami». Choć nasamreč heta nie propaviedź Jevanhiella, a paŭtareńnie fiłasofskich iścin nakštałt «kali chočaš źmianić śviet, pačni ź siabie».

Pavialičyć

Nakolki viadoma viernikam, pieršapačatkova kaścioł dali dla praviadzieńnia kancertaŭ biez padačy z boku ŭładaŭ — muzyki niepasredna damovilisia z probaščam pra toje, što jon biaspłatna daść chram dla vystupaŭ.

Ale zatym hetuju ideju padtrymała kiraŭnictva horada, jakoje ličyć, što takija kancerty pavinny pravodzicca i dalej, pakolki stali «cikavostkaj» Bresta. Takaja situacyja naściarožvaje navat tych viernikaŭ, jakim padabajecca ideja z kancertami ŭ kaściole.

Pavialičyć

Jak by ni było, vierniki čakajuć kamientaroŭ biskupaŭ na hety kont. Pry hetym u inšym padobnym vypadku — kali muzyka z sumnieŭnaj reputacyjaj zapisvaŭ u vobrazie satany klip u staradaŭnim kaściole Niaśviža — nijakaj publičnaj reakcyi duchavienstva tak i nie było.

• 4
• 1
• 1
• 7
• 0
• 0
• 2
• 0