Najlepšyja televiadučyja krainy — Chrustaloŭ i dačka Radźkova

Miuzikł «Kupalskaja kazka» ZAT «Druhi nacyjanalny telekanał» udastojeny Hran-pry XI Nacyjanalnaha konkursu «Televiaršynia», pieradaje BIEŁTA z cyrymonii ŭznaharodžańnia.

Pavialičyć

Jak adznačyła ministr infarmacyi Biełarusi Lilija Ananič, znakavaja statuetka «Televiaršyni» — uznaharoda, da jakoj imkniecca kožny prafiesijanał ajčynnaha telebačańnia, niezaležna ad taho, pracuje jon u stalicy ci ŭ rehijonach. Pa słovach kiraŭnika viedamstva, telekanały ŭnosiać istotny ŭkład u infarmavańnie nasielnictva ab usich padziejach i, u pryvatnaści, ab dasiahnieńniach Biełarusi ŭ samych roznych śfierach.

Ahułam dla ŭdziełu było padadziena 286 zajavak. Konkurs sioleta praviedzieny pa 25 naminacyjach. Tak, najlepšaj hramadska-palityčnaj prahramaj pryznany prajekt «Makiej i Łaŭroŭ. Ab palitycy» (Biełteleradyjokampanija), a najlepšym viadučym hramadska-palityčnaj prahramy staŭ Jahor Chrustaloŭ — viadučy «Što adbyvajecca» (STV). Pieramožca ŭ naminacyi «Najlepšaja tematyčnaja prahrama» — «Moj biznes» (ANT), a najlepšaj viadučaj tematyčnaj prahramy stała Śviatłana Pankratava z «Navin nadvorja» (Biełteleradyjokampanija).

U naminacyi «Najlepšaja štotydniovaja infarmacyjna-analityčnaja prahrama» tryumfataram stali «Kontury» (ONT), najlepšy viadučy infarmacyjna-analityčnaj prahramy — Siarhiej Husačenka z «Hałoŭnaha efiru» (Biełteleradyjokampanija).

Jak «Najlepšy dakumientalny film (cykł)» pieramohu atrymaŭ prajekt «Čarnobyl. 30 hadoŭ praz» telekanała ANT. Najlepšy reparcior pa vynikach 2016 hoda, pa mierkavańni žury, pracuje ŭ «Konturach» — Ihar Tur (ANT), a najlepšaja viadučaja štodzionnaj infarmacyjnaj prahramy — u «Navinach» (dačka Alaksandra Radźkova Julija Piarcova, Biełteleradyjokampanija). Najlepšymi viadučymi zabaŭlalnaj prahramy rašeńniem sudziejskaj kalehii pryznanyja supracoŭniki STV Anton Martynienka i Alaksandra Kaštanava («Ranica. Studyja dobraha nastroju»).

Vystupaje staršynia praŭleńnia ZAT «Druhi nacyjanalny telekanał» Marat Markaŭ

Zvańnia najlepšaj štodzionnaj infarmacyjnaj prahramy ŭdastojenyja «Našy naviny» (ANT), zvańnia najlepšaj prahramy dla dziaciej i junactva — navukovaje šou prafiesara «Adkryvaškina» (Biełteleradyjokampanija).

Siarod kulturna-aśvietnickich prahram lidaram stała pieradača «Takija dziŭnyja» (pradstaŭnictva MTRK «MIR» u Biełarusi). U naminacyi «Najlepšaja sacyjalnaja rekłama» pieramohu atrymaŭ pradukt «My — adzinyja!» vytvorčaści telekampanii «VajenTV».

Najlepšaj zabaŭlalnaj prahramaj nazvanaja «Dźvie zorki» (STV). Zvańnia «Najlepšaja televizijnaja pradziusarskaja hrupa» na «Televiaršyni» ŭdastojeny pradstaŭniki Biełteleradyjokampanii Ivan Ejsmant, Siarhiej Husačenka, Viktoryja Siankievič, Dźmitryj Bačkoŭ, Julija Piarcova i Juryj Prakopaŭ («Panarama» pad adkrytym niebam»). Najlepšym režysioram staŭ supracoŭnik ANT Illa Baranaŭ, jaki adkazvaŭ za ŭračysty kancert dla delehataŭ i haściej V Usiebiełaruskaha narodnaha schodu.

Pradstaŭnik Salihorskaha telekanała Natalla Puńko adznačanaja jak najlepšy viadučy rehijanalnaha telebačańnia (prahrama «Zakon i prava»). Najlepšymi prajektami rehijanalnaha telebačańnia pryznanyja telemarafon «Sahrejem dziciačyja sercy» (teleradyjokampanija «Mahiloŭ») i «Padarožža bieź miežaŭ» (Lidskaje telebačańnie). Najlepšaja infarmacyjnaja prahrama rehijanalnaha telebačańnia - «Naviny na «4» (teleradyjokampanija «Hrodna»). Što tyčycca inšych uznaharod dla rehijonaŭ, u naminacyi «Najlepšaja tematyčnaja prahrama» pieramohu atrymali «Historyi ramontu» teleradyjokampanii «Brest».

Najlepšy televizijny dyzajn, na dumku členaŭ žury, pradstaŭleny ŭ prajekcie Biełteleradyjokampanii «Humar na vajnie, abo Śmiech skroź ślozy» (aŭtar — Vital Savienka). Hetaja ŭznaharoda prysudžanaja paśmiarotna, jaje atrymała ŭdava Vitala Savienki. Najlepšym apierataram taksama staŭ supracoŭnik miedyjachołdynha Dzianis Sakałoŭski (prahrama «Efiekt Kałabanava»). U naminacyi «Najlepšy scenaryst» tryumfataram stała Hanna Ejsmant, jakaja pracavała nad prajektam «Jakaŭ Šapira. Adzin za ŭsich» (Biełteleradyjokampanija).

Prysudžanyja i śpiecyjalnyja pryzy «Televiaršyni». Biełteleradyjokampanii — za sacyjalny prajekt «Moj Bahdanovič» telekanała «Biełaruś 3», nakiravany na papularyzacyju biełaruskaj movy i litaratury, prapahandu čytańnia. Halinie Złabienka — scenarystu, členu praŭleńnia Biełaruskaha sajuza kiniematahrafistaŭ, členu Sajuza žurnalistaŭ, dacentu kafiedry režysury kino i telebačańnia fakulteta ekrannych mastactvaŭ BDAM — za asabisty ŭkład u raźvićcio nacyjanalnaha telebačańnia i radyjoviaščańnia, padrychtoŭku kvalifikavanych kadraŭ.

ANT adznačany anałahičnaj uznaharodaj za stvareńnie ŭnikalnaha maštabnaha prajekta «Talent krainy», jaki nakiravany na raskryćcio tvorčaha patencyjału dziaciej, dapamahaje źviarnuć uvahu na talenavituju moładź. Akramia taho, uznaharodžanyja Minskija televizijnyja infarmacyjnyja sietki — za žyćcieśćviardžalnuju pazicyju ŭ padačy infarmacyi ab žyćci biełaruskaj stalicy ŭ prahramie «Dobryja naviny».

• 0
• 0
• 0
• 0
• 0
• 0
• 0
• 0