Krynicy: u Siryi ŭ bai z amierykancami zahinuli dziasiatki bajcoŭ rasijskaj pryvatnaj vajskovaj kampanii

Dziasiatki bajcoŭ rasijskich «pryvatnych vajskovych kampanij» zahinuli pry sutyknieńni z amierykanska-kurdskimi siłami ŭ Siryi niekalki dzion tamu. 

Pra heta pišuć niekalki rasijskich tielehram-kanałaŭ, u tym liku WarGonzo i Directorate 4, jakija detalova aśviatlajuć apieracyju ŭ Siryi. Aficyjna Maskva pra hibiel svaich hramadzian nie paviedamlała.

Kanał WarGonzo apublikavaŭ niekalki aŭdyjazapisaŭ, na jakich rasijskija vajskoŭcy raspaviadajuć ab tym, što zdaryłasia. U aŭdyja šmat łajanki, dasłoŭna rasšyfravać ich niemahčyma, ale ŭ cełym havorka idzie pra toje, što pry niejkim sutyknieńni ŭ Siryi zahinuli bolš za 200 čałaviek.

«Byli pindosy [amierykancy] … Spačatku artoj [artyleryjaj] nakryli, potym padniali čatyry viartuški [viertaloty] i ŭ karusiel zapuścili z bujnakalibiernych kulamiotaŭ… U našych, akramia aŭtamataŭ, ničoha nie było. Naohuł zładzili tam piekła. Pindosy peŭna i dakładna viedali, što heta my idziom, ruskija, voś našy išli zavod adciskać, a jany na hetym zavodzie siadzieli… Vielmi šmat chto źnik bieź viestak».

Na druhim zapisie hołas kaža: «Bracie, nu zirni. Tam […] zabitych — tolki 5-ja rota. 2-ku praktyčna nie začapiła. Karaciej, 5-ku ŭsiu źniščyli, ich raskačali tam avijacyjaj, viartuškami, artyleryjaj, i kurdy z amierykancami na ich papiorli, u pacanoŭ prosta nie było šancaŭ, 5-ka lehła amal usia».

Na trecim zapisie hołas raspaviadaje, što pierad atakaj amierykancy padniali svoj ściah i rasstralali kałonu, što rušyła na ich. Jon dzivujecca, «na što našy spadziavalisia»: «Typu sami syduć? Źlakajucca?»

Čaćviorty hołas paviedamlaje: «Z techniki, kaža, acaleŭ adzin tank i adzin BRDM, a ŭsie astatnija «bardaki», usie astatnija tanki byli źniščany ŭ pieršyja chviliny boju adrazu».

Kanał Directorate 4 piša, što hibiel rasiejcaŭ adbyłasia ŭ chodzie ŭdaru 8 lutaha, kali «avijacyja krain Zachadu naniesła ŭdar pa siłach, jakija atakavali pazicyi «Siryjskich demakratyčnych sił» (SDS) u rajonie nasielenaha punkta Chašam». Adnak hetaja krynica nie pryvodzić kankretnych ličbaŭ.

Boj išoŭ za radovišča, jakoje stała cellu ŭradavych vojskaŭ. Mahčyma, ich padtrymoŭvała rasijskaja pryvatnaja vajskovaja kampanija. 

«Usie baki sychodziacca ŭ tym, što ŭ vyniku ŭdaru było zabita kala sta čałaviek, — paviedamlaje Directorate 4. — Siarod ich jak šarahovyja sałdaty, tak i vysokapastaŭlenyja aficery i bryhadny hienierał Jusuf Ajša Chajder… Akramia niepasredna vajskoŭcaŭ siryjskaj armii, u napadzie brali ŭdzieł iranskija «Bryhady Fatymijun» i pradstaŭniki rasiejskaj pryvatnaj vajskovaj kampanii. Z nahody apošniaj razharelisia sprečki datyčna taho, kolki mienavita rasijan było zabita. Adny nazyvajuć ličby (ad 15 da 50 adnych tolki zabitych), inšyja mierajuć «KamAZami».

8 lutaha aficyjnyja pres-słužby i ŚMI publikavali infarmacyju, zhodna ź jakoj amierykanskija siły nanieśli artyleryjskija i avijacyjnyja ŭdary pa praŭradavych siłach i zabili bolš za 100 čałaviek. Kaalicyja nazvała hetyja dziejańni «samaabaronaj». Pavodle źviestak amierykancaŭ, u nastupie brali ŭdzieł kala 500 čałaviek, jakija byli spynienyja supolnymi dziejańniami źniščalnikaŭ F-22 i F-15, a taksama dronaŭ MQ-9. Amierykancy i ich sajuźniki strat nie panieśli (tolki adzin kurd byŭ paranieny).

Pra toje, što zabitych i paranienych rasijan — sotni, paviedamiŭ i Ihar Strałkoŭ (Hirkin) — adzin z kamandziraŭ šturmavikoŭ, što ŭ 2014 hodzie raspačali vajnu ŭ Danbasie. «Dla kramloŭskich stratehaŭ usie ludzi — śmiećcie», — rezka dadaje jon.

Hibiel dziasiatkaŭ vajskoŭcaŭ na Jeŭfracie śledam za źbićciom rasijskaha šturmavika, katastrofami ŭ samoj Rasii i vykryćciom karupcyjnych suviaziaŭ najbližejšaha paplečnika Pucina — niehatyŭny fon dla prezidenckich vybaraŭ u krainie, što adbuducca ŭ sakaviku. Nivodzin realny apanient Pucina na vybary nie dapuščany. U ich udzielničajuć tolki sparynh-partniory ad psieŭdaapazicyjnych partyj i hrupovak. 

Pryvatnyja vajskovyja kampanii Rasii, u pryvatnaści, «ČVK Vahniera» vykarystoŭvajuć byłych vajskoŭcaŭ. Mnohija ličać, što jany jość zakamuflavanaj častkaj siłaŭ biaśpieki Rasii.

• 0
• 0
• 0
• 0
• 0
• 0
• 0
• 0