U Minsku złodziej jechaŭ pa abjavie pradavać skradzieny telefon, ale ŭ aŭtobusie sustreŭ jaho haspadara
Historyja, vartaja siužeta kryminalnaj kamiedyi, adbyłasia ŭ Minsku. 28‑hadovy sieryjny złodziej skraŭ darahi telefon u novaha znajomaha, ale atrymać hrošy nie paśpieŭ, bo vypadkova sieŭ z achviaraj u adzin transpart.
Usio pačałosia z taho, što chłopcy paznajomilisia ŭ milicejskim pastarunku. Jany abodva byli zatrymanyja pa roznych spravach — za što mienavita, nie paviedamlajecca.
Jany chutka znajšli supolnuju movu. Kali ich adpuścili, mužčyny vyrašyli adznačyć svajo vyzvaleńnie i nakiravalisia ŭ hości da adnaho ź ich.
Tam hość zaŭvažyŭ karobku ad novieńkaha smartfona i adrazu prydumaŭ płan: spačatku jon skraŭ karobku, a kali jany razam pajšli ŭ kramu, paprasiŭ u haspadara i sam telefon nibyta «na chvilinku patelefanavać».
Smartfon kaštavaŭ 1750 rubloŭ. Uładalnik daŭ hadžet i pajšoŭ u kramu, a jaho novy pryjaciel prosta syšoŭ, vykinuŭšy pa darozie sim-kartu.
Paźniej mužčyna vystaviŭ skradzieny telefon na papularnuju handlovuju placoŭku ŭ internecie. Pakupnik znajšoŭsia chutka, i jany damovilisia pra sustreču.
Pradaviec sieŭ u aŭtobus i pajechaŭ na ździełku, jak raptam u sałonie jaho niechta paklikaŭ.
Pa niejmaviernym supadzieńni ŭ hety ž samy aŭtobus zajšoŭ toj samy paciarpieły, jaki adrazu pacikaviŭsia, dzie ž jaho majomaść.
Smartfon daviałosia viarnuć na miescy, u aŭtobusie pačałasia svarka. Mužčyny razam vyjšli na najbližejšym prypynku, dzie haspadar telefona pabačyŭ milicyjaniera i tut ža zdaŭ jamu ašukanca.
Jak paviedamili «Minsk-Navinam» u prakuratury Frunzienskaha rajona, zatrymany minčanin aficyjna nie pracuje, raźviedzieny i ŭžo maje piać sudzimaściej za kradziažy. Na jaho zaviali čarhovuju kryminalnuju spravu. Svaju vinu jon całkam pryznaŭ. Akramia sudu, mužčynu čakaje prymusovaje lačeńnie ad chraničnaha ałkahalizmu.
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna6
Kamientary