EADaily: Śviatkavańnie Dnia Voli — čarhovaja sastupka biełaruskim nacyjanalistam

EADaily

U čarhovym materyjale sajta rasijskaha šavinistyčnaha resursu EADaily žurnalistka Kryścina Mielnikava zrabiła vysnovu, što «dazvoł na śviatkavańnie stahodździa abviaščeńnia niezaležnaści tak zvanaj Biełaruskaj Narodnaj Respubliki (BNR), jakoje biełaruskaja apazicyja adznačyć mitynham i kancertam u centry Minska 25 sakavika — heta čarhovaja sastupka biełaruskim nacyjanalistam i novaje paćvierdžańnie taho, što dziejučaja ŭłada idzie na pavadu ŭ nacyjanalistyčnaj apazicyi».

U jakaści ekśpiertaŭ u artykule vystupili Andrej Suzdalcaŭ (u svoj čas departavany ź Biełarusi), siabar Rady pa mižnacyjanalnych adnosinach pry prezidencie Rasii Bahdan Biaspalka i biełaruski prarasijski palityčny analityk Žan Čubukoŭ.

Suzdalcaŭ miarkuje, što biełaruskija ŭłady abrali kampramisny varyjant — na dziaržaŭnym uzroŭni śviatkavać stahodździe BNR nie stali, ale dazvolili apazicyi adznačyć hetuju datu ŭ centry Minska. «Heta aznačaje, što sučasnaja biełaruskaja ŭłada nie pryznaje BNR u jakaści pieršaj niezaležnaj biełaruskaj dziaržaŭnaści, ale jana jaje i nie admaŭlaje», — adznačyŭ jon.

Na dumku siabra Rady pa mižnacyjanalnych adnosinach pry prezidencie Rasii Biaspalki, dla biełaruskaj ułady dazvoł na śviatkavańnie daty ŭjaŭlaje saboj peŭny krok u bok prymireńnia z apazicyjaj na fonie peŭnych ciažkaściaŭ u rasijska-biełaruskich adnosinach.

«Niekatory ideałahičny bahaž biełaruskaj apazicyi moža być cikavy dla ciapierašnich uładaŭ z punktu hledžańnia apraŭdańnia adsutnaści intehracyi z Rasijskaj Fiederacyjaj jak u ramkach Sajuznaj dziaržavy, tak i ŭ cełym jak apraŭdańnie vychadu Biełarusi ŭ 1991 hodzie sa składu SSSR. Kali sumiaścić usie hetyja faktary, my i atrymajem toje, što 25 Sakavika budzie śviatkavacca hadavina BNR z dazvołu biełaruskich uładaŭ, jakija raniej byli nastrojenyja suprać padobnaha rodu mierapryjemstvaŭ. Heta śviedčyć ab pavolnym ruchu biełaruskaj ułady i apazicyi nasustrač adzin adnamu. Pry peŭnych umovach jany mohuć utvaryć niešta adzinaje», — padsumavaŭ Biazpalka.

Ale najbolš ekzatyčnym mierkavańniem adznačyŭsia Žan Čubukoŭ. Palityčny analityk ź Biełarusi razvažaje:

— Tak zvanaje «śviatkavańnie» źbiare jak zvyčajna niekalki dziasiatkaŭ čałaviek. Im daduć pahavaryć u kamieru. Za imi projduć šeściem jašče niekalki dziasiatkaŭ. Ale my ž razumiejem, što navat niekalki dziasiatkaŭ nacystaŭ u centry Minska — heta apahańvańnie pamiaci kožnaha čaćviortaha žychara hetaj krainy, jaki byŭ zabity nacystami i ich chaŭruśnikami.

Na dumku Čubukova, stvaralniki BNR byli radykalnymi nacyjanalistami i dyktatarami, jakija žadali ŭmacavać svaju ŭładu z dapamohaj akupantaŭ.

Fond stratehičnaj kultury

U hetym vydańni apublikavany materyjał, u jakim nieviadomy aŭtar padaje historyju BNR sa zvykłymi prapahandysckimi štampami. Z dapamohaj manipulacyj da čytača davodzicca dumka, što BNR nibyta maje dačynieńnie da fašyzmu.

«Žycharoŭ Biełarusi sprabujuć pierakanać u tym, što sučasnaja Biełaruś — pierajemnica BNR, ściah jakoj ŭpryhožvaŭ terytoryju hienieralnaj akruhi Biełaruś rejchskamisaryjata Ostłand ŭ pieryjad Vialikaj Ajčynnaj vajny. Łahičny łancužok pierajemnaści ŭ alternatyŭnaj realnaści nastupny: BNR-Ostłand-RB. Pieršyja dva pieryjady — heta i jość razryŭ z Rasijaj. Siudy ž apazicyjaniery chočuć dałučyć i ciapierašniuju biełaruskuju niezaležnaść, pakolki bieź jaje vychodzić nie 100 hadoŭ, a ŭsiaho tolki mienš za čatyry, pryčym za try ź ich hitleraŭcami było źniščana bolš za 22% nasielnictva kraju».

Aŭtar miarkuje, što ideja pierajemnaści Biełarusi ad BNR — razburalnaja. I ŭ tym, što apazicyi atrymoŭvajecca pakrokava dałučać da jaje biełaruskuju ŭładu, niama ničoha dobraha dla Biełarusi.

«Niadrenna b biełaruskaj uładnaj elicie — jak staroj, tak i novaj — aśviažyć u pamiaci histaryčnyja pieryjady dystancyjavańnia ad Ruskaha śvietu, a zaadno i pryhadać, što dobraha jany prynieśli biełarusam», —

piša Fond stratehičnaj kultury.

• 0
• 0
• 0
• 0
• 0
• 0
• 0
• 0