Słužba biaśpieki Ukrainy vinavacić hramadzianina Biełarusi Paŭła Karnazyckaha ŭ raspaŭsiudžańni «antyŭkrainskaj prapahandy», paviedamiła pres-słužba SBU. Pry kancy 90-ch Karnazycki emihravaŭ i pryznaŭsia, što byŭ zavierbavany biełaruskim KDB dla zboru infarmacyi na aktyvistaŭ apazicyi (tady jon uznačalvaŭ Maładuju Hramadu).
SBU śćviardžaje, što Karnazycki, jaki pražyvaŭ va Ukrainie nielehalna, pašyraŭ fejkavuju infarmacyju. U pryvatnaści, «padčas vystupaŭ na niekatorych televizijnych kanałach jon staviŭ pad sumnieŭ pryznanyja mižnarodnaj supolnaściu dokazy prysutnaści vojskaŭ krainy-ahresara na časova akupavanych terytoryjach našaj krainy», havorycca ŭ paviedamleńni.
Taksama Karnazyckaha vinavaciać u tym, što jon «nieadnarazova publikavaŭ antyŭkrainskija materyjały na miedyja-resursach, padkantrolnych terarystyčnym arhanizacyjam «DNR» i «ŁNR».
Staršynia SBU Vasil Hrycak adznačyŭ, što paśla ŭviadzieńnia abmiežavańniaŭ na ŭjezd rasijskich hramadzian va Ukrainie śpiecsłužby RF ŭsio čaściej pryciahvajuć da pravakacyj zamiežnikaŭ. «Dziejnaść padobnych prapłočanych Rasijaj prapahandystaŭ stavić pad pahrozu nie tolki nacyjanalnyja intaresy Ukrainy, ale i supiarečyć zakanadaŭstvu krainy ich pachodžańnia», — adznačyŭ staršynia SBU.
2 studzienia 2019 Karnazyckaha prymusova viarnuli ŭ Biełaruś z zabaronaj ujezdu va Ukrainu terminam na try hady.
Paŭłu Karnazyckamu 43 hady, jon skončyŭ BDU, aktyŭna ŭdzielničaŭ u hramadska-palityčnym žyćci Biełarusi ŭ druhoj pałovie 1990-ch, byŭ lidaram moładzievaj arhanizacyi Biełaruskaj Sacyjał-Demakratyčnaj Hramady. Paśla pryznaŭsia, što byŭ zavierbavany KDB i pracavaŭ na śpiecsłužby pad psieŭdanimam «Rałan». Ad kanca 1990-ch žyŭ va Ukrainie, dzie zasnavaŭ infarmacyjny partał glavnovosti.com.
Na sajcie Korrespondent.net prezientavaŭ siabie jak «žurnalist i bahasłoŭ. Patryjot Ukrainskaj Rusi. Palityčny ahladalnik».
«Vyskačyć na vulicu ŭ karotkich spadničkach — heta vy mahli. I ŭsich hvałtavali tam». Łukašenka ŭspomniŭ kinošnikam 2020-y i zaklikaŭ spynicca10
Kamientary