11‑hadovaja dačka blizkaha da Šejmana biznesmiena Alaksandra Zinhmana robić hałavakružnuju karjeru śpiavački
Dziaŭčyna abdymajecca ź Iharam Krutym i radujecca łajkam ad Lepsa, a šlach da mary bačyć u Maskvie.
Dačce biełaruskaha biznesmiena Alaksandra Zinhmana — čałavieka, ciesna źviazanaha ź Viktaram Šejmanam apieracyjami ŭ Afrycy, — 11 hadoŭ. Marharyta zajmajecca ŭ minskaj studyi «Ctudyjopłej».
Užo niekalki hadoŭ artystka šturmuje dziciačy «Słavianski bazar», ale pakul jaje najlepšy vynik — udzieł u finale nacyjanalnaha adboru. Zatoje letaś dačka biznesmiena zaśviaciłasia na televizijnych šou — rasijskim «Hołas. Dzieci» i biełaruskim dziciačym «Faktar.baj».
U rasijskim televizijnym prajekcie Marho trapiła ŭ kamandu Natalli Padolskaj i Uładzimira Praśniakova. Tam dziaŭčyna raspaviała, što lubić šyć cacki ź fietru i, kali raptam nie ŭdasca stać śpiavačkaj, budzie dyzajnierkaj. Ale ž na etapie «pajadynkaŭ» biełaruska vylecieła.
Udzieł u biełaruskim šou staŭ dla Marho bolš paśpiachovym. Užo padčas pieršaha kastynhu jana tak spadabałasia śpiavačcy Naści Kraŭčanka, što taja nacisnuła «załatuju knopku» — heta dało mahčymaść adrazu pieraskoknuć u etap «kresły».
U vyniku na dziciačym «Faktar.baj» Zinhman dajšła da supierfinału i trapiła ŭ top-5 najlepšych śpievakoŭ.
U adnym ź intervju šou dziaŭčynka raspaviadała pra svaju siamju. Kazała, što sama padobnaja da maci, ale praz hetaje padabienstva charaktaraŭ jany časta spračajucca. Mienavita mama adkazvaje za vobrazy Marho.
A zajmajecca dziaŭčynkaj bolš za ŭsio babula — jana vozić unučku na biaskoncyja repietycyi. Babulu ž Marho nazyvaje samym strohim čałaviekam u siamji.
Pra tatu artystka kaža litaralna niekalki słoŭ — pra toje, što jon mocna ŭsich lubić.
U inšym intervju Marho pryznavałasia, što ščaśliva žyć u zamožnaj siamji, ale ž ličyć, što mocna vychvalacca hetym nie varta: «Spadziajusia, ja nie vyhladaju razbeščanaj».
Na pytańnie, ci pieściać jaje baćki, Marho adkazała, što nasamreč nie: jana zaŭsiody hladzić na ceny, kab było nie zanadta darahoje: «Na dzień naradžeńnia nabyvajuć adzieńnie, pra jakoje ja daŭno maryła. A kožny dzień — nie».
Sioleta Marho ŭdzielničała ŭ dziciačaj «Novaj chvali» ŭ Maskvie — zaniała druhoje miesca (dakładniej, padzialiła jaho jašče z adnoj dziaŭčynaj) i atrymała ŭ padarunak kamplekt abstalavańnia dla chatniaj studyi.
Ciapier ža Marho rychtujecca ŭ listapadzie palacieć u Taškient — budzie reprezientavać Biełaruś na mižnarodnym konkursie «Naša pakaleńnie». Konkursnuju pieśniu — «Ja trymaju dałoniami śviatło» — napisaŭ dla školnicy znakamity rasijski pradziusar i kampazitar Maksim Fadziejeŭ.
Darečy, jon nie ŭpieršyniu pracuje na junuju biełarusku. Naprykład, u lipieni Marho vypuściła sumiesny trek z mamaj — jon nazyvajecca «Mam?» (muzyku dla jaho napisaŭ Fadziejeŭ).
Zdajecca, žonka Zinhmana Lizavieta, jakaja raniej paśpieła papracavać dyrektarkaj modnaha minskaha restarana Falcone (u 2025 hodzie restaran zakryŭsia praź finansavyja prablemy), ciapier taksama dumaje pra karjeru śpiavački. Navat psieŭdanim abrała — Eljiza.
Niadaŭna Marho vypuściła pieśniu pra svoj šlach da mary — i nazyvajecca trek «Maskva». U pieśni dziaŭčyna nazyvaje stalicu Rasii svaim «nastaŭnikam i losam».
Ciapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj46
Kamientary
I za vsiem etim—tień ubijcy Hončara i Zacharienko.
A mielnica H-nia nie ostanavlivajetsia, mielet miedlenno,no očień tonko.