Pry vyklučanym śviatle: u Małdovie prarasijskija i prajeŭrapiejskija siły pajšli na kampramis, kab adchilić ad ułady Płachatniuka
Pasiedžańnie parłamienta jašče nie skončyłasia, a Kanstytucyjny sud Małdovy ŭžo abviaściŭ jaho rašeńni niezakonnymi. Sud i raniej prymaŭ rašeńni, vyhadnyja multymiljanieru Uładzimiru Płachatniuku i jaho Demakratyčnaj partyi, ale siońnia situacyja była asablivaja. Suprać Płachatniuka abjadnalisia nieprymirymyja vorahi.
Prarasijskaja Sacyjalistyčnaja partyja prezidenta Dadona i prajeŭrapiejskaja kaalicyja Acum («Zaraz») razam vałodajuć 61 hołasam u 101-miascovym parłamiencie. Niahledziačy na procidziejańnie byłoj ułady — u budynku parłamienta navat adklučyli śviatło — jany padpisali «časovaje palityčnaje pahadnieńnie» i dyscyplinavana prahałasavali za ŭzhodnieny śpis kandydataŭ, paviedamlaje Newsmaker.md.
Novaj premjerkaj stała byłaja ministr adukacyi Maja Sandu z Acum — supiernica Dadona na apošnich prezidenckich vybarach. Jana pryniesła prysiahu prosta ŭ zale plenarnych pasiadžeńniaŭ, u prysutnaści Dadona, jaki i ŭnios jaje kandydaturu.
Premjer u Małdovie maje bolš ułady, čym prezident.
Pierad hałasavańniem deputataŭ Sandu zajaviła: «Dyktatar paŭ. Ź siońniašniaha dnia aliharchičny režym — u apazicyi».
«Deputaty abjadnalisia nasupierak usim adroźnieńniam, kab pieramahčy režym. Siońnia pačaŭsia praces ačyščeńnia Małdovy i budaŭnictva inšaj budučyni dla krainy i hramadzianaŭ», — abviaściła Sandu.
Jana zajaviła, što ŭrad budzie pracavać va ŭmovach kryzisu, i z-za adroźnieńniaŭ pamiž palityčnymi prahramami jaho składu nie fakt, što jon pratrymajecca doŭha.
Ale jana paabiacała, što niahledziačy ni na što, novy Kabmin budzie pracavać dziela hramadzian. Sandu zajaviła, što Kabmin zojmiecca ačyščeńniem dziaržinstytutaŭ, viernie davier zamiežnych partnioraŭ Małdovy i damožacca adnaŭleńnia finansavaj dapamohi z boku ES i inšych partnioraŭ, palepšyć sacyjalnyja pasłuhi i budzie aktyŭna zajmacca ukaranieńniem Pahadnieńnia ab asacyjacyi ź ES.
«Adsutnaść viery ŭ zaŭtrašni dzień — hałoŭnaja pryčyna taho, što ludzi źjazdžajuć, — zajaviła Sandu. — My adkryjem novuju staronku», — paabiacała kandydatka ŭ premjery.
Śpikierkaj parłamienta stała byłaja premjerka, sacyjalistka Zinaida Hrečanaja.
Ministram unutranych spraŭ i vice-premjeram staŭ Andrej Nestase z Acum.
Ministram zamiežnych spraŭ i pa pytańniach jeŭraintehracyi staŭ biespartyjny Nikałaje Papesku.
Deputaty ŭ toj ža dzień adpravili ŭ adstaŭku kiraŭnikoŭ śpiecsłužby i antykarupcyjnaha biuro, a taksama pryniali dekłaracyju ab dealiharchizacyi. U pryvatnaści, nastupnyja vybary projduć pa partyjnych śpisach, a nie pa źmiašanaj mažarytarna-praparcyjnaj sistemie, spryjalnaj dla biznesoŭcaŭ u palitycy.
Deputaty ad Demakratyčnaj partyi ŭ hałasavańni nie ŭdzielničali, a Kanstytucyjny sud u režymie anłajn abviaściŭ rašeńni niezakonnymi. Telekanały, jakija kantraluje toj samy Płachatniuk, ceły dzień paŭtarali mantru pra zdradu Dadona radzimie i realizacyju prarasijskaha scenara.
Što cikava, na pasiedžańni parłamienta razam prysutničali pasły ZŠA i Rasii, a taksama pasłańnik Jeŭrasajuza. Pierad pasiadžeńniem jany sustrelisia z prezidentam Dadonam, jaki painfarmavaŭ ich pra płan «vialikaj kaalicyi».
Heta redki ŭ historyi Uschodniaj Jeŭropy vypadak, kali prajeŭrapiejskija, nacyjanalna-libieralnyja i prarasijskija siły abjadnoŭvajucca dla adchileńnia ad ułady staroha kiraŭnictva, jakoje zdavałasia niepataplalnym.
Pamiatajecie kadeta, jaki na sustrečy z Łukašenkam śmieła vystupiŭ pa-biełarusku? Jon vyjechaŭ z krainy21
Kamientary