«Ci ŭtrymlivaje ese «Niezaležnaść — heta…» łozunhi suprać intehracyi?»: jak sudzili piśmieńnika Uładzimira Arłova
U Minsku praciahvajucca sudovyja pracesy nad udzielnikami antyintehracyjnych akcyj, jakija adbyvalisia ŭ Minsku 7—8 śniežnia. Na adnoj z akcyj z pramovaj vystupiŭ viadomy piśmieńnik Uładzimir Arłoŭ.
Jon začytaŭ u miehafon svajo ese «Niezaležnaść — heta…», jakoje było napisanaje jašče za savieckim časam, ale, na dumku aŭtara, praciahvaje zastavacca aktualnym pa siońnia. Hetaha chapiła dla taho, kab pačać administracyjny praces. Jon prachodziŭ u Leninskim sudzie stalicy.
Na sudzie prysutničali kalehi-piśmieńniki Andrej Chadanovič, Barys Piatrovič, Aleś Paškievič, Natałka Charytaniuk, Taćciana Niadbaj, pravaabaroncy Taćciana Raviaka i Alena Tankačova, režysior Aleh Daškievič.
«Dziakuj usim. U mianie z saboj jość suški. Paśla suda, kali ŭsio dobra skončycca, kožny atrymaje pa sušcy», — pieršaje, što skazaŭ u sudovaj zale Arłoŭ. Viadoma, na takija słovy pačuŭsia rohat.
Spadar Arłoŭ adrazu zajaviŭ chadajnictva, kab praces adbyvaŭsia na biełaruskaj movie. Sudździa Alaksiej Kiślak zadavoliŭ hetaje chadajnictva i imhnienna pierajšoŭ na biełaruskuju. Praŭda, u jaho z hetym uźnikli značnyja prablemy. Naprykład, kazaŭ «Akciabrskaja płošča», z «z 12 da 15 časoŭ» i h.d.
Druhim chadajnictvam było zajaŭleńnie ŭ jakaści śviedki pierakładčyka Lavona Barščeŭskaha, jakoha sudzili ŭčora taksama za ŭdzieł u antyintehracyjnaj akcyi 8 śniežnia. Maŭlaŭ, Barščeŭski moh by paviedamić, što ni ściaha ŭ rukach u Arłova nie było, ni łozunhaŭ jon nie vykrykvaŭ. Sudździa admoviŭ. U zale pačuŭsia śmiech i paraŭnańni pracesu z cyrkam.
«Jak piśmieńnik, ja pavinien być śviedkam tych padziej, jakija adbyvajucca ŭ abaronu našaj niezaležnaści», — skazaŭ Uładzimir Arłoŭ.
«Ale vinu vy pryznajecie?» — praciahvaŭ nastojvać na svaim Kiślak.
«Nie pryznaju», — adkazaŭ piśmieńnik.
Tym nie mienš, Arłoŭ pryznaŭ, što znachodziŭsia na Kastryčnickaj płoščy ŭ toj dzień, ale byŭ bieź ściaha i ničoha nie vykrykvaŭ. «Ja začytaŭ svoj litaraturny tvor u padtrymku niezaležnaści».
«Ci viedali vy, što akcyja niesankcyjanavanaja?» — pytajecca sudździa.
«Viedaŭ. Dakładniej, daviedaŭsia na płoščy. Ja pračytaŭ tam ese «Niezaležnaść — heta…»
«Ci jość u ese niejkija łozunhi?»
«Niama nijakich łozunhaŭ i zaklikaŭ, tam adlustravanyja mary majho i nie tolki majho pakaleńnia pra niezaležnaść», — skazaŭ piśmieńnik.
Paśla hetaha Uładzimir Arłoŭ staŭ začytvać svajo ese. Zała sustreła pračytańnie apładysmientami.
Pieršym pakazańni staŭ davać amapaviec Hierasimovič. Cikava, što sudździa pry hetym nie pierajšoŭ na ruskuju movu.
«Nu tak, naprykancy jon kryknuŭ «Žyvie Biełaruś. Vy čytali z papierki, što takoje niezaležnaść pa-vašamu», — adkazaŭ Hierasimovič Arłovu. Pakazańni druhoha śviedki Andreja Štopa nie adroźnivalisia ad Hierasimoviča. Ahułam praces zaniaŭ chvilin 25.
U vyniku piśmieńnik byŭ aštrafavany na 20 bazavych vieličyniaŭ (540 rubloŭ).
Paśla abviaščeńnia prysudu Uładzimir Arłoŭ, jak i abiacaŭ, razdavaŭ suški. Śviedki-milicyjanty ad ich admovilisia.
Hladzi taksama: «U mianie nie siaredniaja adukacyja, ja kandydat navuk!» Jak sudzili pasła Piatra Sadoŭskaha
Ciapier čytajuć
Hety biełarus daśleduje rak — voś što jon kaža pra SPF ad miełanomy, navukovy prahres i samy składany ŭ lačeńni rak3
Kamientary