Top sučasnych elitnych žyllovych kompleksaŭ Minska. Kvadrat tam kaštuje da 11 000 dalaraŭ
Pahladzieli, pa čym pradajuć kvatery ŭ stylnych elitnych kompleksach, pabudavanych za apošnija hady.
Depo
Kvartał «Depo» kala płoščy Pieramohi ličycca samym darahim. Niekatoryja ekśpierty nazyvajuć jaho adzinym sapraŭdy elitnym ŽK u Minsku.
Na hety momant u pracesie budaŭnictva znachodziacca čatyry damy. Dva ź ich musiać zdać sioleta, i tolki ŭ adnym ź ich u prodažy zastalisia dźvie kvatery. Jašče šeść jość u domie, jaki zdajuć naleta, i piać kvater — u domie, jaki dabudujuć tolki ŭ 2028 hodzie.
Ceny na hetyja vosiem kvater nieviadomyja.
Ale ŭ prodažy chapaje kvater, jakija pradajucca ŭ susiednich damach. Samaja tannaja prapanova — dvuchpakajoŭka z hołymi ścienami ahulnaj płoščaj 50,6 m². Prosiać za jaje 275 tysiač dalaraŭ, abo pa $5435 za kvadrat.
Admietna, što ŭ 2023 hodzie na etapie budaŭnictva dvuchpakajoŭki ŭ «Depo» płoščaj 50,5 m² možna było nabyć za 160 tysiač dalaraŭ ($3170/m²).
U prodažy jość jašče dvuchpakaŭjoka na 57 kvadrataŭ za 385 tysiač dalaraŭ, taksama biez ramontu. Kvadrat tut ahułam vychodzić pa 6150 dalaraŭ, ale treba ŭličvać, što ŭ košt uvachodziać kładoŭka i mašyna-miesca ŭ padziemnym parkinhu.
Hołuju trochpakajoŭku płoščaj 94 m² pradajuć za 485 tysiač dalaraŭ, ci pa 5170 dalaraŭ za kvadrat. Biez parkovačnaha miesca.
A za samuju darahuju kvateru ŭ elitnym kvartale prosiać amal miljon dalaraŭ. Praŭda, heta ŭžo kvatera, całkam hatovaja dla pražyvańnia, z ramontam, meblaj i technikaj. Trochpakajoŭku z ahulnaj płoščaj 89 mietraŭ vystavili za 980 tysiač dalaraŭ. Heta, na chvilinačku, pa $11 tysiač za mietr!
Andrejeŭski
ŽK «Andrejeŭski» — jašče adzin kompleks u centralnaj častcy Minska, vykanany ŭ skandynaŭskim styli.
U dvuch damach, jakija ciapier budujucca, budzie 100 kvater.
Kvadrat u hetym ŽK kaštuje ad 2250 da 2800 dalaraŭ.
Tamu ŭ paraŭnańni z «Depo» ceny na kvatery tut, možna skazać, biudžetnyja.
Maestra
Žyllovy kompleks mieścicca na vulicy Niamiha, 46. U krokavaj dasiažnaści znachodzicca stancyja mietro «Płošča Franciška Bahuševiča».
Hety 20‑paviarchovy ŽK zaniaŭ pieršaje miesca na fiestyvali Biełaruskaha sajuza architektaraŭ u naminacyi «Žyłyja šmatpaviarchovyja damy».
Na sajcie zabudoŭščyka paznačana, što kvadrat kaštuje ad 2000 dalaraŭ i tam jość jak minimum dzieviać nieraspradadzienych kvater ad zabudoŭščyka płoščaj ad 50 da 250 kvadrataŭ.
Jašče dźvie kvatery biez ramontu jość u prodažy ad ułaśnikaŭ. Za hołyja ścieny i 76 kvadrataŭ na 16 paviersie prosiać 275 tysiač dalaraŭ (pa $3600/m²).
A za kvateru na 53 mietry na šostym paviersie — 253 tysiačy ($4800/m²).
Paŭnočny bierah
Hety žyllovy kompleks prasłaviŭsia tym, što ceny na kvatery ŭ im ahučvali tolki paśla ŭniasieńnia zvarotnaha depazitu pamieram 7000 rubloŭ.
Zabudoŭščyk nazyvaje ŽK «Paŭnočny bierah» pryncypova novym pohladam na žyły kompleks — jon raźmieščany na bierazie raki i akružany pryrodaj.
Praŭda, sapraŭdy kaštoŭnyja tam nie ŭsie kvatery, a tolki tyja, što mieściacca na parkava-prybiarežnaj linii.
Tak, naprykancy 2025 hoda samaja tannaja kvatera, pradadzienaja ŭ domie na vulicy Vitala Ćvirki, 88, maje płošču 62,3 kvadratnaha mietra. Jaje kupili amal za 319 tysiač dalaraŭ — heta pa 5118 dalaraŭ za kvadratny mietr (pa tahačasnym kursie).
Kvatera płoščaj 79 kvadratnych mietraŭ stała samaj darahoj — 450 tysiač dalaraŭ, što składała 5692 dalary za kvadratny mietr.
Nizkapaviarchovaja «Levada»
Blizkimi da elitnych ličacca kvatery ŭ 4‑ 5‑paviarchovych damach u kvartale «Levada».
Samaja dastupnaja kvatera ŭ čatyrochpaviarchovym domie na Novavilenskaj maje ahulnuju płošču 80 mietraŭ i pradajecca za 235 tysiač dalaraŭ ($2940/m²).
Samaja darahaja kvatera ŭ kvartale znachodzicca ŭ susiednim domie. Za čatyrochpakajoŭku płoščaj 103 mietry, z hołymi ścienami i trochmietrovymi stolami prosiać 345 tysiač dalaraŭ ($3340/m²). U canu ŭvachodzić parkovačnaje miesca.
Chto kuplaje?
Letaś Realt.by, spasyłajučysia na danyja šviejcarskaha banka UBS u daśledavańni Global Wealth Report 2023 hoda, pisaŭ, što ŭ Biełarusi žyvie kala 7300 dalaravych miljanieraŭ.
Pa inšych acenkach nazyvałasia ličba ŭ 10—12 tysiač miljanieraŭ.
Bolš za 80 pracentaŭ pakupnikoŭ elitnaha žylla — heta biełarusy. Jašče kala 10% — etničnyja biełarusy, jakija zarabili za miažoj, i kala 10% — zamiežniki.
Ciapier čytajuć
Anžalika Mielnikava paśla źniknieńnia nabyła dźvie kvatery ŭ Minsku20
Kamientary