Zabiła muža i napisała dziciačuju knihu, kab pieražyć hora. Jak vykryli piśmieńnicu

Žycharka štata Juta Kury Ryčyns, aŭtar dziciačaj knihi pra toje, jak spravicca sa śmierciu blizkaha, pryznana vinavataj u zabojstvie svajho muža. Prysiažnym spatrebiłasia ŭsiaho try hadziny, kab pryznać: Ryčyns sprabavała atrucić jaho dva razy — z tym, kab z dapamohaj strachoŭki za jaho žyćcio vyrašyć svaje finansavyja prablemy. Pavodle zakonaŭ Juty, jaje čakaje turemny termin ad 25 hadoŭ da pažyćciovaha źniavoleńnia, piša Bi-bi-si.

Siamja Ryčyns vyhladała ŭzornaj. U 39‑hadovaha Eryka i 31‑hadovaj Kury da 2022 hoda było troje dziaciej. Jany žyli ŭ adnym z samych prestyžnych miescaŭ Juty — pobač z harnałyžnym kurortam Park Sici. U Eryka Ryčynsa byŭ paśpiachovy biznes, źviazany z ablicoŭkaj damoŭ kamieniem, Kury pracavała ryełtaram, prapanoŭvajučy klijentam darahuju nieruchomaść u hetych miescach.

14 lutaha 2022 hoda, u Dzień śviatoha Valancina, Eryk Ryčyns źjeŭ buterbrod, adčuŭ siabie drenna i straciŭ prytomnaść, na jaho ciele źjaviŭsia syp, ale ŭ rešcie rešt jon ačuniaŭ.

Mienš čym praź miesiac, 4 sakavika, Ryčynsy pravodzili zvyčajny viečar doma. Dzieci pajšli spać, Kury pryhatavała harełačny kaktejl «Maskoŭski muł», a zatym pajšła ŭ pakoj da dziciaci, jakomu pryśniŭsia drenny son.

Jana praviała ŭ jaho davoli doŭhi čas, zatym viarnułasia, lehła pobač z mužam i vyjaviła, što jon nie dychaje. Kury patelefanavała ŭ słužbu vyratavańnia.

U chodzie słuchańniaŭ u sudzie vyśvietliłasia, što svajaki Eryka Ryčynsa adrazu paśla jaho śmierci zapadozryli, što jana mahła być nievypadkovaj. Ich padazreńni jašče bolš umacavalisia, kali stała viadomaja pryčyna: pieradaziroŭka fientaniłam. Heta sintetyčny apioid, jaho dziejańnie ŭ dziasiatki razoŭ macniejšaje za inšyja papularnyja ŭ ZŠA apioidy — hierain abo aksikancin.

U kryvi Ryčynsa znajšli dozu narkotyku, jakaja pieravyšała śmiarotnuju ŭ piać razoŭ.

Pavialičyć

Sama pa sabie pieradaziroŭka fientaniłam dla ZŠA — raspaŭsiudžanaja źjava. U 2021‑m ad preparata zahinuli bolš za 100 tysiač čałaviek. Ale ŭ Eryka Ryčynsa nie było historyi ŭžyvańnia opiumnych narkotykaŭ. Svajaki naniali pryvatnaha detektyva.

U sakaviku 2023 hoda ŭ prodažy źjaviłasia kniha Kury Ryčyns «Ty sa mnoj?». Havorka ŭ joj išła pra siamju, u jakoj pamior baćka, adnak jon u vyhladzie anioła praciahvaŭ dapamahać svajmu synu. Pryznačanuju dla dziaciej knihu zaŭvažyli, Kury Ryčyns dała niekalki intervju.

U apisańni na sajcie Amazon (zaraz kniha adtul vydalenaja) havaryłasia, što jana napisana lubiačaj maci i zaklikana «prapanavać suciašeńnie i padtrymku junym ludziam u dastupnaj i zajmalnaj formie».

8 maja 2023‑ha Ryčyns zatrymała palicyja pa abvinavačvańni ŭ zabojstvie muža i ŭ machlarstvie sa strachavymi vypłatami. Sud adpraviŭ jaje pad aryšt biez prava vyzvaleńnia pad zakład.

Słuchańni pa jaje spravie z udziełam kala čatyroch dziasiatkaŭ śviedak prajšli ŭ lutym i sakaviku 2026-ha.

U siamji Ryčyns byli prablemy: Eryk prachodziŭ kurs pa kiravańni hnievam, Kury była ŭpeŭniena, što jon zdradžvaŭ joj, i sama zaviała raman z čałaviekam, jakoha naniała na pracu.

Ale ŭ asnovie prablem byli hrošy. Siabroŭka Ryčyns Elisan Rajt raskazvała na sudzie, što Kury adčuvała siabie «ŭ finansavaj pastcy» paśla zaklučeńnia šlubnaha kantrakta.

Bok abvinavačańnia dakazvaŭ, što Kury Ryčyns u svaim ryełtarskim biznesie abychodziłasia z hrašyma chaatyčna. Za košt zvyčajnych i terminovych kredytaŭ, mikrapazyk pad vialikija pracenty jana była vinnaja 4,5 młn dalaraŭ bolš čym dvaccaci roznym kredytoram.

Strachoŭka muža ad hibieli i jaho majomaść dazvolili b joj pretendavać prykładna na 4 młn.

Nieŭzabavie paśla śmierci Eryka Ryčynsa jaho žonka padpisała dakumienty ab nabyćci asabniaka — i, pa mierkavańni dapytanych u sudzie ekśpiertaŭ, heta pavialičyła b jaje daŭhavuju nahruzku prykładna da 7,5 młn dalaraŭ. Pa strachavych polisach muža paśla jaho śmierci jana paśpieła atrymać 1,35 młn dalaraŭ.

Dapytany ŭ sudzie ekśpiert pa ličbavaj kryminalistycy raskazaŭ, što ŭ historyi pošukavych zapytaŭ Kury Ryčyns byli słovazłučeńni «što takoje śmiarotnaja doza fientaniłu», «raskošnyja turmy dla bahatych u Amierycy».

Kury Ryčyns kateharyčna nie pryznavała svaju vinu ŭ hibieli muža. Abarona i zaraz budavała svaju pazicyju na hetym, a zatym niečakana admoviłasia ad dopytu samoj Ryčyns i vykliku śviedak.

U sudzie pakazali tekst, jaki Kury Ryčyns napisała na retrycie ŭ lutym 2021 hoda. Adnym z zadańniaŭ tam było — raskazać svaju historyju žyćcia ŭ treciaj asobie.

Ryčyns raskazała pra dziaŭčynu, jakaja jašče z baćkami jeździła pa 17 roznych štatach. U jaje siamji kanfiskavali dom z-za hulniavoj zaležnaści ŭ maci. Pieršy raz zaciažarała jana jašče ŭ škole, vyjšła zamuž, paśla naradžeńnia treciaha dziciaci daviedałasia, što muž joj zdradžvaje. Źviartałasia da śpiecyjalista z-za tryvožnaści i depresii. Adčuvała siabie niedastatkova dobraj dla svajho muža i sprabavała heta pieraadoleć.

Prysiažnym spatrebiłasia try hadziny, kab pryznać Kury Ryčyns vinavataj pa ŭsich punktach. Tolki za zabojstva joj pahražaje ad 25 hadoŭ pazbaŭleńnia voli da pažyćciovaha źniavoleńnia, da hetaha terminu sud dadaść abvinavačvańni ŭ sprobie zabojstva 14 lutaha i ŭ machlarstvie. Sud pa abvinavačvańniach u inšych finansavych parušeńniach projdzie asobna.

• 0
• 0
• 0
• 3
• 0
• 2
• 0
• 0