18 sakavika Vilenskaja haradskaja rada na svaim pasiadžeńni razhladaje pytańnie ab źmienie statutaŭ troch škoł, jakija pracujuć na movach nacyjanalnych mienšaściej.
Heta dazvolić farmiravać kłasy, asnoŭnaj movaj navučańnia ŭ jakich budzie litoŭskaja, paviedamiła ahienctva BNS.
Źmieny płanujecca zrabić u vilenskich himnazii imia Franciška Skaryny, dzie navučańnie adbyvajecca pa-biełarusku, škole imia Lva Karsavina z ruskaj movaj navučańnia i himnazii ŭ Hryhiškach, dzie vykładajuć pa-polsku i pa-rusku.
«Źmianiajucca statuty niekatorych škoł, dadatkova ŭvodzicca litoŭskaja mova, što adkryvaje mahčymaść farmiravać kłasy, asnoŭnaja mova navučańnia ŭ jakich — litoŭskaja», — skazaŭ vice-mer Vilni Vitaŭtas Mitałas napiaredadni pasiadžeńnia.
Pavodle vice-mera Mitałasa, da takoha rašeńnia ŭdałosia pryjści biez kanfrantacyi i pry padtrymcy samich škoł.
«Pradstaŭniki nacyjanalnych mienšaściej i nadalej zmohuć vyvučać svaju rodnuju movu, ale asnoŭnaj movaj pradmietaŭ, pakolki na hetaj movie zdajucca ekzamieny, budzie dziaržaŭnaja litoŭskaja mova», — padkreśliŭ Vitaŭtas Mitałas.
Vice-mer adznačyŭ, što takija źmieny nieabchodnyja, kab navučency lepš padrychtavalisia i zdali ekzamieny, paviedamiła BNS.
U Vilenskaj himnazii imia Franciška Skaryny pazityŭna ŭspryniali pryniaćcie źmienaŭ u statut ustanovy. Namieśnica dyrektara himnazii Jurate Narvajšenie nazvała taki krok vielmi słušnym.
«Hetak pavinna być pavodle zakona. U škołach nacyjanalnych mienšaściej pavinny być dźvie movy navučańnia: dziaržaŭnaja litoŭskaja jak asnoŭnaja i mova nacyjanalnaj mienšaści. Usio prosta, ciapier heta budzie paznačana i ŭ statucie ŭstanovy», — skazała Svabodzie spadarynia Narvajšenie, jakaja časova vykonvaje abaviazki dyrektara himnazii.
Radyjo Svaboda pahavaryła ź Mikałajem, baćkam adnaho z navučencaŭ himnazii imia Franciška Skaryny.
Jon miarkuje, što źmieny ŭ statut himnazii nie buduć zaminać biełaruskamu navučańniu dziaciej, ale zabiaśpiečać adpaviednaść zakonu i paspryjajuć pryjomu novych biełaruskich dziaciej.
«Heta rašeńnie čakałasia, ja b jaho vitaŭ, bo jano budzie spryjać intehracyi i davać dadatkovyja mahčymaści dzieciam zasvoić litoŭskuju movu, jakaja im vielmi spatrebicca. U toj ža čas, biezumoŭna, bolšaść baćkoŭ ličyć vielmi važnym zachoŭvać biełaruskamoŭnuju sutnaść himnazii — tamu biełarusy śviadoma addajuć dziaciej vučycca mienavita siudy. I administracyja himnazii zapeŭniła baćkoŭ, što navučalny praces budzie zachoŭvacca jak pieravažna biełaruskamoŭny, a ŭstanova zastaniecca biełaruskaj u sutnaści», — miarkuje Mikałaj.
Pavodle Mikałaja, baćki navučencaŭ himnazii vitali aficyjnuju pazicyju horada Vilni, kali sioleta 28 studzienia municypalnaja rada pryniała pratakolnuju rezalucyju, u jakoj adznačyła ŭnikalny charaktar himnazii jak adzinaj za miežami Biełarusi dziaržaŭnaj škoły ź biełaruskaj movaj navučańnia i dekłaravała namier i dalej jaje padtrymlivać.
«Jak adzin z baćkoŭ ja vielmi spadziajusia, što dadańnie dziaržaŭnaj movy ŭ statut himnazii nie pryviadzie da vyciskańnia biełaruskaj i što horad strymaje svajo słova», — padzialiŭsia spadzievami Mikałaj.
Vilenskaja himnazija imia Franciška Skaryny, u jakoj zajmajucca kala 400 vučniaŭ, zasnavanaja ŭ 1994 hodzie spačatku jak škoła, a ŭ 2013 hodzie atrymała status himnazii. Heta adzinaja dziaržaŭnaja navučalnaja ŭstanova ŭ Litvie z navučańniem pa-biełarusku.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary
U krainie, dzie hałoŭnym dziaržaŭnym dakumientam byŭ Statut VKŁ na starabiełaruskaj movie....
Vycisnuli aficyjnuju movu Statuta, pa jakoj žyła kraina VKŁ stahodździami - ŭ adzinuju na ŭsiu krainu škołu.
Nichto ź litoŭcaŭ nie ŭ stanie pračytać hałoŭny dakumient VKŁ....
Biełaruskaja mova ŭ škole i tak była słabaja i heta nijak nie zrobić situacyju lepš.