15‑hadovy akcior z Hrodna z nadryvam začytaŭ «Hoj ty, Ruś moja, rodnaja». I spraviadliva adchapiŭ ad biełarusaŭ
15‑hadovy hrodzieniec Viačasłaŭ Kanarazaŭ vykłaŭ u sacsietki videa — dekłamacyju vierša Siarhieja Jasienina «Hoj ty, Ruś moja, rodnaja». Padača — jak na vialikaj scenie: emocyi, nadryŭ, pozirk u dalačyń. Sam rolik padletak pazicyjanuje jak samaprobu. Ale zamiest zachapleńnia atrymaŭ chvalu krytyki.
«Biełaruskich vieršaŭ nie znajšłosia?»
U kamientaryjach da videa bolš za sotniu reakcyj. I značnaja častka ź ich pra vybar materyjału. Asabliva iranična heta vyhladaje na fonie taho, jak chłopiec sam pradstaŭlaje siabie ŭ sacsietkach: «Pryvitańnie, mianie zavuć Słava, i ja akcior ź Biełarusi!»
«Biełaruskich vieršaŭ nie znajšłosia?» — pytajuć biełarusy ŭ kamientarach.
«Akcior ź Biełarusi, ale nie biełaruski. Navošta prapahandavać maskalščynu?» — aburajucca adnyja.
«Sapraŭdnyja biełarusy prapahandujuć biełaruskich dziejačaŭ kultury», — zaŭvažajuć inšyja.
«Lepš by ty Maksima Bahdanoviča ci Janku Kupału pračytaŭ», — dadajuć nastupnyja.
Niekatoryja reahujuć jašče bolš rezka, nie škadujučy junaka:
«Maskal, nie prylepvajsia da biełarusaŭ».
«Ruski ty, ale nijak nie biełarus».
«Šanoŭny, možna słužyć Mielpamienie, a možna prysłužvać režymu maskala. Prabač, ale ty kulturny kałabarant».
Inšyja kamientatary sprabujuć pieravieści razmovu ŭ prafiesijnuju płoskaść:
«Čytać z vyražeńniem — heta nie značyć kryčać».
«Čeł, pieraihryvaješ strašenna», — padkazvajuć u kamientarach.
Ad Biaduli da Vasiljeva
Viačasłaŭ Kanarazaŭ skončyŭ teatralnaje adździaleńnie hrodzienskaj škoły mastactvaŭ i ciapier hraje ŭ moładzievym teatry «Hrodzienskaja nadzieja».
U 2025 hodzie jon zaniaŭ druhoje miesca na konkursie «Žyvaja kłasika», čytajučy biełaruski tvor — «Ziamlu» Źmitraka Biaduli.
A ŭžo ŭ 2026 hodzie Viačasłaŭ pieramoh u tym ža konkursie, ale ź inšym materyjałam: «V śpiskach nie značiłsia» Barysa Vasiljeva.
Paralelna z hetym chłopiec zdymajecca ŭ kino. U jaho filmahrafii ŭžo niekalki prajektaŭ, u tym liku sieryjały «Partyzany», «Daloka da Maskvy», «Cezar», a taksama film «Nie adna doma — 3». U karotkamietražcy «Paleva» ŭ jaho hałoŭnaja rola.
U sacsietkach junak čytaje Majakoŭskaha, Jeŭtušenku, navat źniaŭsia ŭ videa ŭ vobrazie Jasienina.
Maniera Kanarazava — hučnaja, z nadryvam — nahadała televizijnuju viersiju Jasienina. Zrešty, chłopiec zachaplajecca rasijskim akcioram Siarhiejam Biazrukavym, jaki jakraz ihraŭ rolu paeta ŭ rasijskim sieryjale, jaki vyjšaŭ u 2005 hodzie.
U karotkich videa samaprobaŭ Viačasłava — teksty pra radzimu (savieckuju), podźvih, partyzan.
Ciapier čytajuć
«Kali b nie «Viasna-1996, my b byli Tatarstanam». 30 hadoŭ tamu biełarusy ŭžo pratestavali suprać Łukašenki i Rasii — jak heta było13
Kamientary
Z Babrujska padobnyja čamuści amal usi źjechali razam z žydami ci naadvarot
Ni znachodziat jany u Breście Harodnie siabie tamu abirajut bolšaść zrazumieły" uschod" niechta "cikavy poŭdzień" ..