Šrajbman: Kali pravieści spraviadlivyja vybary, u apazicyi byli b 40% u parłamiencie i bolšaść u Minharsaviecie
Palityčny ahladalnik Arciom Šrajbman u intervju sajtu «Intieriesnyje ludi» parazvažaŭ pra toje, jak mahła b vyhladać idealnaja Biełaruś, kali b u joj byli svabodnyja vybary, i jakija palityčnyja siły byli b siarod lidaraŭ.
Šrajbman adznačaje, što pry aŭtarytarnym režymie patencyjnaje pole kandydataŭ začyščana jašče na padychodach.
«My nie viedajem tych ludziej, jakija byli b zdolnyja ŭ inšaj situacyi vyłučycca ŭ palityku: bujnyja biznesmieny, tałkovyja błohiery-aktyvisty, čynoŭniki, bankiry, jurysty», — kaža ahladalnik.
Jon ličyć, što siońnia siarod biełaruskaha topavaha biznesu jość ludzi, jakija majuć kalapalityčnyja ambicyi i ŭjaŭleńni ab tym, jak pavinna raźvivacca kraina: Viktar Prakapienia, Viktar Babaryka, mahčyma Aleh Chusajenaŭ.
Šrajbman ličyć, što jość ludzi va ŭładzie, jakija ŭ inšaj sistemie pry inšych uvodnych chutčej za ŭsio pasprabavali b siabie ŭ palitycy. U jakaści prykładu jon pryvodzić Šunieviča.
Taksama bolš aktyŭna prajaŭlali b siabie siońniašnija apazicyjaniery.
«My pryvykli ličyć, što naša apazicyja — słabaja, palityčna vylehčanaja siła. Navat nie siła — słabaść. Ale ŭ adroźnieńnie ad kandydataŭ ułady, apazicyjaniery za hetyja 25 hadoŭ choć niejak zajmalisia palityčnaj dziejnaściu. Kali pravieści spraviadlivyja vybary ŭ Minski harsaviet, upeŭnieny, što bolšaść miescaŭ byli b u apazicyjanieraŭ. Hetyja ludzi mahli b mieć u parłamiencie 40% hałasoŭ. Mnohija apytańni pakazvajuć, što za apošnija 5-6 hadoŭ biełarusy stali bolš prarynačnymi, mienšymi paternalistami, mienš chočuć udziełu dziaržavy ŭ rehulavańni ŭsiaho, bolš raźličvajuć na siabie. Heta značyć, što vyrasła elektaralnaja baza», — kaža Šrajbman.
-
«Mnie kazali: ty havoryš jak kanadski emihrant». Siarhiej Šupa raskazaŭ pra Vilniu 90-ch, paraŭnańnie litoŭskaj litaratury ź biełaruskaj i adroźnieńni pamiž narodami
-
Łukašenka pavodzić siabie ŭ «makdonaldsie» jak u savieckaj stałoŭcy. I dumaje, što heta kruta
-
Pucin užo pavinšavaŭ Madžtabu Chamieniei, a Łukašenka nie. Čaho čakaje?
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju19
Kamientary