31 sakavika admianili zahad ad 26 sakavika ab časovym spynieńni prafahladaŭ
Zahadam pieršaha namieśnika ministra achovy zdaroŭja Biełarusi № 369 ad 31 sakavika byŭ admienieny zahad ministerstva № 344 ad 26 sakavika ab časovym spynieńni praviadzieńnia prafahladaŭ u paliklinikach.
Piaćciu dniami raniej ministerstva zahadała spynić prafahlady z 30 sakavika da 20 krasavika. Adpaviednyja abviestki źjavilisia va ŭsich paliklinikach Biełarusi. Pra suviaź hetaha spynieńnia z pandemijaj karanavirusa ŭ zahadzie nie ŭzhadvałasia, ale takaja łohika naprošvałasia.
Prychod dadatkovaj kolkaści ludziej u palikliniki pavialičvaje nahruzku na miedpiersanał, a taksama pavialičaje ryzyku vypadkovaha kantakta z chvorymi i inficyravańnia.
Šerah supiarečlivych rašeńniaŭ raniej pryniali taksama struktury adukacyi. Spačatku jany kateharyčna admaŭlali nieabchodnaść karancinu ŭ škołach, paśla dazvolili baćkam pa žadańni nie adpraŭlać dziaciej u škoły.
Biełaruś — adzinaja z krain rehijona, jakaja nie ŭviała strohich karancinnych abmiežavańniaŭ, choć, zhodna z dastupnaj statystykaj, kolkaść zachvorvańniaŭ u nas z susiednimi krainami supastaŭnaja.
Niahledziačy na toje, što epidemičny stan u krainie nie abvieščany, mnohija ministerstvy i viedamstvy realizujuć de-fakta karancinnyja miery.
Ministerstva ŭnutranych spraŭ pryniało kompleks mier pa prafiłaktycy virusnych infiekcyj u svaim składzie, a taksama ŭ padviedamasnych ustanovach, u tym liku papraŭčych ustanovach.
Mnohija teatry admianili śpiektakli, a inšyja pačali tranślavać ich anłajn, kab źmienšyć kolkaść naviednikaŭ u załach. Admianiŭ płanavanyja ekskursii i lekcyi Nacyjanalny mastacki muziej krainy.
Na «prafiłaktyku» na krasavik začyniŭsia Minski akvapark — najbolšy ŭ krainie.
My nazirajem redki vypadak, kali mnohija struktury dziejničali faktyčna ŭrazrez z raniejšymi zajavami Alaksandra Łukašenki, jaki niekalki razoŭ nazyvaŭ karanavirus «psichozam».
«Ja hety karanavirus nazyvaju niajnačaj jak psichozam i ad hetaha nikoli nie admoŭlusia, bo razam z vami pieražyŭ užo mnohija psichozy, i my viedajem, da čaho heta pryvodziła, — zajaviŭ Alaksandr Łukašenka. — Ja absalutna pierakanany, što my možam bolš paciarpieć ad paniki, čym ad samoha virusa. Voś heta mianie bolš za ŭsio chvaluje».
Raniej Minski mietrapaliten paviedamiŭ, što kolkaść pasažyraŭ u sakaviku pamienšała na čverć.
Rytoryka biełaruskich uładaŭ u apošnija dni trochi źmianiłasia paśla taho, jak ź Viciebska i šerahu inšych haradoŭ stali nadychodzić źviestki pra rost kolkaści inficyravanych.
Ciapier čytajuć
U dzień pačatku Pieciarburhskaha ekanamičnaha forumu USU nanieśli dziasiatak udaraŭ pa naftavym terminale ŭ porcie horada i bazie Bałtfłota ŭ Kranštacie34
Kamientary