«Niama na jaho artykuła — treba prydumać». U internecie źjaviŭsia zapis z vykazvańniami pra Cichanoŭskaha. Hołas padobny da Karajeva

Abjadnańnie aficeraŭ-siłavikoŭ za hramadzianskija pravy BYPOL apublikavała materyjały, jakija datyčać zatrymańnia Siarhieja Cichanoŭskaha ŭ Hrodnie. Siarod inšaha, u internecie źjaviŭsia i aŭdyjazapis, na jakim čałaviek z hołasam, padobnym da hołasu eks-ministra ŭnutranych spraŭ Juryja Karajeva kaža pra čałavieka, jaki «bolš niebiaśpiečny za ŭsich hetych Babarykaŭ», «treba pasadzić jaho nadoŭha».

Proźvišča Cichanoŭskaha na zapisie nie hučyć. Adnak z kantekstu robicca jasna, što havorka mienavita pra hetaha krytyka Alaksandra Łukašenki, jaki nie byŭ dapuščany da ŭdziełu ŭ vybarach, a ŭ kancy maja i ŭvohule byŭ zatrymany pa dziŭnych abvinavačvańniach padčas adnaho ź pikietaŭ pa zbory podpisaŭ za kandydaturu svajoj žonki, Śviatłany Cichanoŭskaj.

— Hety bydłahan krainu chacieŭ razhajdać: na pachilenych płatach, budoŭlach niejkich staršyniaŭ rajvykankamaŭ i sielsavietaŭ, jak jany sabie tam piać rubloŭ skrali. Ja kazaŭ pazaŭčora ŭ intervju, što jon, hetaja pačvara, u Rasii bačyŭ u šmat razoŭ horš za ŭsie hetyja pytańni, ale tam jon svoj pahany rot nie adkryvaŭ: «My z čałaviekam raźbiaromsia!». A tut pryjechaŭ na samuju cichuju nivu, na samaje pakorlivaje nasielnictva, na samych lepšych milicyjantaŭ u śviecie! I pačaŭ «musara» tam, «my razhajdajem hetuju ŭładu», bačačy, što jamu niama procidziejańnia. Dobra, što jaho chłopnuli. Škaduju tolki, što pozna. Choć vy ž u kastryčniku maju ŭvahu na heta źviartali. My z kamitetaŭskimi pracavali razam. I dobra, što va ŭsich chapiła mudraści choć kaliści jaho ŭbačyć i chłopnuć.

Chaj kryčyć uvieś śviet: «Po priediełu, po biespriediełu». Takaja pačvara bolš niebiaśpiečnaja, čym usie. Jon bolš niebiaśpiečny za ŭsich hetych Babarykaŭ. Jon razburalnik dziaržavy. Niama na jaho artykuła — treba prydumać i pasadzić jaho nadoŭha. Chaj tam siadzić! Chaj zdochnie tam! — havoryć hołas na zapisie.

U BYPOL śćviardžajuć, što hety aŭdyjozapis byŭ zrobleny na zakrytaj sustrečy Juryja Karajeva z adnym z padraździaleńniaŭ.

Heta nie pieršy aŭdyjazapis z hałasami, padobnymi da hałasoŭ top-čynoŭnikaŭ Biełarusi. Raniej hramadstva było šakavanaje zapisami razmoŭ, datyčnymi hibieli Ramana Bandarenki.

«Naša Niva» nie zmahła atrymać kamientar aficyjnych asob adnosna hetaha aŭdyjazapisu. U pres-słužbie MUS nam nie adkazali i nie zdymali słuchaŭku. Sami my nie možam pravieści ekśpiertyzu praŭdzivaści aŭdyjozapisu i vyznačyć, kamu naležyć hołas na im, možna tolki skazać, što vidavočnych elemientaŭ mantažu nie nazirajecca. 

Čytajcie taksama: «Pryjemnaja dziaŭčyna pyšnych form». Identyfikavali pravakatarku z sustrečy ź Cichanoŭskim

• 0
• 0
• 0
• 0
• 0
• 0
• 0
• 0