Za hod naradžalnaść u Kitai źniziłasia na 15%. Histaryčny antyrekord
Ułady Padniabiesnaj spynili «palityku adnaho dziciaci», ale heta pakul nie daje efiektu.
Zhodna sa źviestkami, apublikavanymi Ministerstvam hramadskaj biaśpieki ŭ Kitai (Ministry of Public Security) na hetym tydni, u 2020 hodzie było zarehistravana tolki 10,03 miljona novanarodžanych u paraŭnańni z 11,79 miljona hod tamu — źnižeńnie naradžalnaści na 14,9%. 2020 staŭ hodam z samym nizkim uzroŭniem naradžalnaści za ŭvieś čas isnavańnia Kitajskaj Narodnaj Respubliki, jakaja była zasnavanaja ŭ 1949 hodzie.
Demahrafičnaje pytańnie moža stać surjoznaj prablemaj dla kitajskaj ekanomiki ŭ budučyni, kali ciapierašniaje pracazdolnaje nasielnictva dasiahnie piensijnaha ŭzrostu. Ekśpierty śćviardžajuć, što, kali takaja tendencyja zachavajecca, to Kitaj sutykniecca z prablemaj stareńnia nasielnictva. Zhodna z apošnimi źviestkami Nacyjanalnaha biuro statystyki (National Bureau of Statistics), letaś u Kitai naličvałasia 250 miljonaŭ čałaviek, starejšych za 60 hadoŭ, što składaje 18% nasielnictva krainy, piša CNN.
Z 1979 da 2015 hoda ŭ Kitai pravodziłasia «palityka adnaho dziciaci» z metaj uziać pad kantrol imklivy rost nasielnictva krainy. Siemji, jakija čakali druhoje dzicia, byli vymušanyja spłočvać vialiki štraf, abo žančyna musiła zrabić abort. U vyniku hetaj palityki ŭzrovień naradžalnaści ŭ Kitai rezka źniziŭsia. U toj ža čas kolkaść ludziej, starejšych za 65, pavialičyłasia z 3% u 1965 hodzie da 10% u 2015, kali ŭrad dazvoliŭ zavodzić da dvuch dziaciej u siamji.
Adnak hety dazvoł nie spyniŭ spad naradžalnaści, bo baćki pryzvyčailisia da raspaŭsiudžanaj u raźvitych krainach tendencyi mieć mienš dziaciej. Nacyjanalny pierapis, jaki pačaŭsia ŭ Kitai ŭ listapadzie, vierahodna, pakaža źnižeńnie nasielnictva Kitaja ŭpieršyniu za dziesiacihodździ, i Indyja moža apiaredzić Kitaj pa kolkaści žycharoŭ.
Čakajuć, što da 2050 hoda 480 miljonaŭ čałaviek u Kitai buduć starejšyja za 60, što składzie treć nasielnictva.
Kitajskija lidary ŭśviedamlajuć, jakuju škodu moža prynieści ekanomicy stareńnie nasielnictva. Ciapier urad imkniecca zaachvočvać siemji da naradžeńnia dziaciej — paśla pakarańniaŭ na praciahu dziesiacihodździaŭ siemjaŭ, dzie było bolš za adno dzicia.
U 2018 hodzie ŭ haziecie «Žeńmiń žybaa», drukavanym vydańni Kamunistyčnaj partyi Kitaja, byŭ apublikavany artykuł, dzie śćviardžałasia, što «naradžeńnie dziaciej — heta nie tolki siamiejnaje, ale i ahulnanacyjanalnaje pytańnie». U artykule taksama było adznačana, što «ŭpłyŭ nizkaj naradžalnaści na hramadstva i ekanomiku ŭžo pačynaje prajaŭlacca».
U kitajskim hramadstvie pačynaje raści cisk na žančyn, kab jany vychodzili zamuž i naradžali dziaciej. Adnak maładyja žančyny, jakija naradzilisia na pačatku XXI stahodździa, uvohule admaŭlajucca ad idei šlubu. Z 2013 da 2019 hoda kolkaść ludziej, jakija ŭstupajuć u šlub u Kitai, skaraciłasia na 41%.
Pa mierkavańni Hitela-Bastena (Gietel-Basten), demohrafa z Hankonhskaha ŭniviersiteta navuki i technałohij, stareńnie nasielnictva ŭ Kitai — niezvarotny praces. Kitajskamu ŭradu varta rychtavacca da hetaha, kab kampiensavać mahčymyja nastupstvy, a nie praciahvać cisk na žančyn. «Heta možna zrabić praz pavyšeńnie pradukcyjnaści pracy, źmieny ŭ adukacyi, reformy piensijonnaj sistemy, sistemy achovy zdaroŭja. Treba inviestavać u heta ciapier, kab źmiakčyć bolš surjoznyja prablemy ŭ budučyni», — ličyć demohraf.
Kamientary