Za abrazu prakurorki Taratynka mužčynu pakarali dvuma hadami chatniaj chimii
U sudzie Pieršamajskaha rajona Minska razhladzieli spravu ŭ dačynieńni da Dźmitryja Nieviaroŭskaha, jakoha vinavacili ŭ abrazie pradstaŭnika ŭłady (art. 369 KK).
Pavodle abvinavačvańnia, Dźmitryj Nieviaroŭski pakinuŭ abraźlivy niecenzurny kamientar u adnym z telehram-čataŭ pad fota staršaj pamočnicy prakurora Frunzienskaha rajona Valeryi Taratynka, čym pryniziŭ jaje honar i hodnaść. Kamientar byŭ dastupny dla nieabmiežavanaha koła karystalnikaŭ internet, paviedamlajuć pravaabaroncy.
Abvinavačany znachodziŭsia pad padpiskaj ab niavyjeździe i naležnych pavodzinach, viadoma, što maje 3 hrupu invalidnaści. U sudzie abaraniaŭ siabie sam. Jon poŭnaściu pryznaŭ vinu.
Valeryja Taratynka raskazała, što 7 śniežnia 2020 hoda ŭ adnym z telehram-kanałaŭ byli raźmieščanyja fota i piersanalnyja danyja, u tym liku śviedčańni pra asabistaje žyćcio: miesca pražyvańnia, mabilny telefon, pašpartnyja źviestki. Tam ža było ŭkazanaje i słužbovaje stanovišča.
Paźniej — 15 studzienia 2021 hoda — ukazany zapis byŭ pradublavany ŭ inšym telehram-kanale, na jakim miełasia mahčymaść kamientavańnia. U hety ž dzień i nastupnyja dni pad zapisam byli raźmieščanyja abraźlivyja kamientary, u tym liku i abvinavačanym.
Abvinavačany vybačyŭsia pierad paciarpiełaj, patłumačyŭ, što ŭ toj viečar pračytaŭ šmat navinaŭ, byŭ uschvalavany i ŭ telehram-kanale pabačyŭ fota i apisańnie pra prakurora, pakinuŭ kamientar. U sudzie kazaŭ, što jaho dziejańnie nie było spraviadlivym, zvyčajna jon nikoha nie abražaje.
«Heta było zroblena mnoj pa hłupstvie, u toj momant ja nie viedaŭ, da čaho heta moža pryvieści».
Taratynka pryniała prabačeńni, vykazała spadziavańnie, što Nieviaroŭski zrobić adpaviednyja vysnovy i bolš nie parušyć zakon. Paśla hetaha jana pakinuła zału suda.
29 lipienia sud ahučyŭ prysud. Maksim Trusievič paličyŭ vinu Dźmitryja Nieviaroŭskaha dakazanaj i pryznačyŭ jamu pakarańnie ŭ dva hady chatniaj chimii.
Mabilny telefon kanfiskavać jak srodak ździajśnieńnia złačynstva, a kanfiskavanyja rečavyja dokazy — źniščyć.
Kamientary