Chto taki Akreścin, z čym imiem ciapier asacyjujecca samy viadomy izalatar u Biełarusi
Nazva «Akreścina» ŭžo stała simvałam, źviazanym ź pieraśledam za palityčnyja pierakanańni. Havorka pra izalatar časovaha ŭtrymańnia, raźmieščany na zavułku Akreścina ŭ Minsku. Raskazvajem, u honar kaho jaho nazvali.
Barys Akreścin — frantavy lotčyk, hieroj Savieckaha Sajuza, jaki pražyŭ usiaho 21 hod.
Naradziŭsia jon u Maskvie ŭ 1923-m u siamji rabočaha. Usio jaho žyćcio było źviazana z avicyjaj, vielmi papularnaj siarod savieckich maładzionaŭ. Akreścin vučyŭsia ŭ aerakłubie, pracavaŭ avijatechnikam i lotčykam-instruktaram. U 1942-m jaho pryzvali ŭ Čyrvonuju armiju.
Vajavaŭ pad Stalinhradam, vyzvalaŭ Ukrainu i Biełaruś. Mieŭ zvańnie starejšaha hvardyi lejtenanta, źjaŭlaŭsia namieśnikam kamandzira eskadrylli.
Akreścin pačynaŭ na samalotach lohkich U-2 u pałku načnych bambardziroŭščykaŭ. Potym pieravučyŭsia na šturmavik Ił-2.
Barys ličyŭsia majstram bambardzirovak aeradromaŭ i čyhunačnych ešałonaŭ.
Tamu jaho «statystyka» całkam łahičnaja. Na kaniec 1943-ha na jaho rachunku było bolš za 40 tankaŭ, vialikaja kolkaść inšaj bajavoj techniki. Siarod inšaha, Akreścin udzielničaŭ u vyzvaleńni ŭschodniaj Biełarusi: bambardziravaŭ ešałony praciŭnika na ŭčastku čyhunki Orša — Tałačyn.
Svaju zasłužanuju zorku Hieroja Savieckaha Sajuza lotčyk atrymaŭ za biezdakornaje vykanańnie zahadaŭ kamandavańnia, asabistuju advahu i hieraizm.
Akreścin zahinuŭ 6-ha lipienia 1944 hoda, praz try dni paśla vyzvaleńnia stalicy. Toje adbyłosia na 20 km na paŭdniovy ŭschod ad Minska (pobač ź vioskaj Apčak).
Savieckaja avijacyja imknułasia likvidavać varožuju hrupoŭku, jakaja praryvałasia ź minskaha «katła» (to-bok z atačeńnia). Samalot Akreścina padbili, ale lotčyk nakiravaŭ achoplenuju ahniom mašynu na kałonu praciŭnika.
Praz try dni, 9-ha lipienia, savieckija vojski trapili ŭ tych miaścinach u łahier nacystaŭ, całkam źniščany savieckaj avijacyjaj. Jak pisaŭ u dakładnoj zapiscy kiraŭnik BSSR Pancielajmon Panamarenka, tam znachodziłasia kala 5 tysiač trupaŭ nacystaŭ. Siarod źniščanaj vajskovaj techniki znajšli i reštki Barysa Akreścina, jakoha ŭračysta pierapachavali ŭ stalicy na Vajskovych mohiłkach.
U honar Akreścina nazvana staličnaja himnazija №30, što na vulicy Kujbyšava. Kala jaje znachodzicca samalot, a taksama pomnik ułasna Akreścinu i jašče dzieviaci lotčykam, jakija zahinuli ŭ pavietranych bajach suprać nacystaŭ. Taksama ŭ jaho honar nazvanyja vulicy ŭ Lidzie i ŭ Minsku (u dadatak da zavułka), skvier pobač z apošniaj.
Na žal, apošnim časam jahonaje imia ŭsio čaściej hučyć u pamiaci nie ŭ suviazi z hierojskimi ŭčynkami na vajnie, a ŭ suviazi z katavańniami, jakija adbyvajucca ŭ izalatary, što znachodzicca na zavułku, nazvanym u jahony honar.
Vaskrasienski: Adkryvajecca nieba — i Aleś Bialacki adrazu vychodzić31
Kamientary