Ryta Dakota raskazała, čamu joj zabaranili śpiavać u Rasii — biełaruski i rasijski «čornyja śpisy» ŭnifikavali

Niadaŭna biełaruskaja śpiavačka Ryta Dakota, jakaja stała papularnaj u Rasii, daviedałasia, što nie moža bolš vystupać tam. Ciapier artystka razam ź siamjoj žyvie na Bali, pieryjadyčna naviedvajecca ŭ ZŠA.

Zabarona na vystupleńni ŭ Rasii stała dla Dakoty šokam. Kaža, što ciapier razburana ŭsio, što jana budavała bolš za 10 hadoŭ: «Nie viedaju, ci chopić mnie sił nanova pabudavać razburanaje. Z nula, u novaj krainie — jakaja mnie nie padabajecca, — biez dośviedu i sacyjalnaha kapitału, bieź siabroŭ pobač».

Artystka śćviardžaje, što pieršapačatkova źjazdžała ŭ ZŠA vučycca, bo mienavita tam pracujuć najlepšyja saŭndpradziusary i kampazitary. Ale žyć tam nikoli nie płanavała, bo heta «vielmi darahaja i niaŭtulnaja kraina». U Łos-Andželes Dakota jechała, kab zapisać anhłamoŭny albom, a potym płanavała viarnucca ŭ Rasiju i vystupać.

Tearetyčna jana moža prylacieć u Rasiju, ale nie bačyć u hetym sensu.

Śpiavačka taksama raspaviała, što narešcie daviedałasia, čamu joj zabaranili vystupać u Rasii. Reč u tym, što Ryta Dakota da hetaha trapiła ŭ «čorny śpis» u Biełarusi. U 2020 hodzie jana padtrymała pratesty i vypuściła pieśniu «Uchodi» — u klip uvajšli realnyja videa razhonu pratestaŭ.

U 2022 hodzie ŭ Biełarusi zatrymali maci artystki — adzin z łukašysckich telehram-kanałaŭ apublikavaŭ fota, na jakim žančyna staić ź bieł-čyrvona-biełym ściaham. Viadoma, što ciapier maci Ryty na svabodzie.

Ryta Dakota raspaviała, što adnosna niadaŭna «čornyja śpisy» abiedźviuch krain abjadnali, tamu ź minułaha hoda jana nie maje prava vystupać i ŭ Rasii.

Artystka zhadała svaje niaŭdałyja sproby prabicca ŭ biełaruski šou-biznes: «Mnie było 15-16 hadoŭ, ja napisała pieśniu «Śpički». Ja ź joj chadziła na ŭsie konkursy. Ja chadziła na «Zorny dyližans» (heta biełaruskaja «Fabryka zorak»), na konkursy aŭtarskich piesień… Chadziła na ANT, na BT… I ŭsiudy mnie kazali, što pieśnia haŭno, što heta nikomu nie treba, što mnie treba śpiavać na biełaruskaj, navošta ja śpiavaju na ruskaj. Što maje pieśni niepatryjatyčnyja, voś heta voś usio».

Pavialičyć

Dakota kaža, byccam mienavita heta historyja vymusiła jaje źjechać u Rasiju. Tam śpiavačka trapiła na «Fabryku zorak», a pieśnia «Śpički» stała adnoj z najbolš papularnych na prajekcie.

Chacia składana pavieryć u toje, što na dziaržaŭnym telebačańni zabaraniali ruskamoŭnuju pieśniu — bo bolšaść biełaruskich artystaŭ śpiavaje mienavita pa-rusku.

• 0
• 3
• 6
• 13
• 0
• 1
• 2
• 1