«Čamu siostry ahitujuć suprać vakcyny?» Što adbyvajecca ŭ manastyry ŭ Navinkach, jaki ŭłady zakryvali z-za kavidu
Śviata-Jelisaviecinski manastyr u rajonie Navinak u Minsku — adzin z najbujniejšych u Biełarusi. Jamu naležyć nie tolki duchoŭny kompleks, u niejkim sensie heta cełaja karparacyja — tut šyjuć adzieńnie, raśpisvajuć ikony i posud, zajmajucca miodam i travami, majuć svaju piakarniu, kafe i navat miedycynski centr. U pieršuju chvalu kavidu, kali siarod žycharoŭ manastyra było šmat chvorych, sanstancyja prymusova zakryła manastyr na karancin. Duchaŭnik Andrej Lemiašonak pryznavaŭ, što tady ŭpaŭ uvieś dachod manastyra, jon nie padtrymlivaŭ zaklikaŭ malicca doma. Na siońniašnich tranślacyjach, jak i hod tamu, bačna, što vierniki prychodziać na słužbu biez masak, zrešty jak i duchavienstva, i nie vytrymlivajuć dystancyju. Stała viadoma, što siostry navat adhavorvajuć ludziej rabić pryščepki. Voś što na heta adkazaŭ Lemiašonak.
«U mianie pytańnie, čamu vašy siostry viaduć ahitacyju suprać vakcyny», — spytali ŭ Andreja Lemiašonka padčas sustrečy ź viernikami.
«My nie za i nie suprać, — z uśmieškaj adkazaŭ śviatar. — Asabista ja, jak naš Alaksandr Ryhoravič, nie budu vakcyjanavacca. Ja hladžu pa našym padvorku. U nas pierachvareła ciapier šmat ludziej. Ale ja skazaŭ im: naša pryščepka — heta cieła i kroŭ Chrysta. Arhanizm čałavieka vypracoŭvaje imunitet. I ja baču, što hety imunitet pracuje.
Tamu što tydzień tamu ŭ ludziej była tempieratura pad 40, a ciapier kažuć: «Nu, baciuška, dziakuj Bohu, pačali pracavać». I heta ludzi nie z vydatnym zdaroŭjem, jany ŭžo svajo zdaroŭje rastracili na hrech (na padvorku pry manastyry žyvie kala 200 čałaviek, mnohija ź ich majuć sudzimaści, zaležnaść ad narkotykaŭ i ałkaholu — zaŭv. «NN»). Mnie zdajecca, treba być vielmi aściarožnym z hetymi vakcynami, tamu što jany da kanca nie vyvučanyja.
Ja vykazvaju svajo mierkavańnie. Da mianie pryjechaŭ čałaviek ź Viciebska i kaža: «Maje rodnyja zrabili pryščepku, a zaraz u balnicy, dvoje — u reanimacyi». Ja sustrakaŭ ludziej, jakija zrabili vakcynu, i ciapier im fizična drenna.
Ja razumieju, što ludzi buduć i pamirać, i naradžacca. Zaraz i hryp pačniecca. U nas niama nijakaj ahitacyi. Moža być, siostry pa svaim nierazumieńni… Vy napisali, ja spytaju ŭ ich. Jany pavinny słužyć Bohu i suciašać ludziej, my ni za što nie ahitujem. Kali čałaviek heta robić, jon robić heta ad siabie. Ale razvažać my možam, nichto nie moža zabrać u nas heta prava».
Lemiašonak pryznaŭsia, što da jaho na spoviedź prychodziać ludzi, jakija pryznajucca, što ŭ ich kavid. «Dobra, kažu im, budziem lačycca. A ja ž biez maski, — dadaŭ jon. — Ciapier niama kali chvareć, treba pracavać».
Jašče letaś, kali pałova sa 130 manaškaŭ zaraziłasia karanavirusam, kiraŭnictva manastyra, viedajučy heta, nie admianiła słužby da Vialikadnia.
Tady ž kiraŭnik Ruskaj pravasłaŭnaj carkvy, jakoj padparadkoŭvajecca Biełaruskaja pravasłaŭnaja carkva, zaklikaŭ: «Kali łaska, nie chadzicie ŭ carkvu. Kali łaska, pamaliciesia doma». Toj ža pasył vykazvaŭ i kiraŭnik BPC.
Lemiašonak na heta adkazvaŭ tak: «My nie Rasija, my Biełaruś, my troški adroźnivajemsia. Prezident Biełarusi skazaŭ: «Ja pryjdu i pastaŭlu śviečku».
A voś jakuju pazicyju pa vakcynacyi zajmaje ciapier Biełaruskaja pravasłaŭnaja carkva:
«Vybar na karyść pryščepki ci admovy ad jaje źjaŭlajecca indyvidualnym rašeńniem kožnaha čałavieka. Razam z tym niedapuščalnym i hrešnym źjaŭlajecca raspaŭsiud iłžyvych vučeńniaŭ, atajesamleńnie vakcynacyi z «pryniaćciem antychrysta», roŭna jak i zajavy, što z dapamohaj vakcynacyi adbyvajecca tajemnaje čypiravańnie čałaviectva.
U hetych umovach uzrastaje adkaznaść kožnaha śviatara, pakolki mienavita pastyrskaje słova abo parada moža stać vyznačalnaj u vypadku zvarotu pa tłumačeńnie, ci varta rabić pryščepku».
Tym časam Ministerstva achovy zdaroŭja štodzień zajaŭlaje ab antyrekordach pa kolkaści zachvorvańniaŭ. Miedyki padkreślivajuć, što tolki vakcynacyja nasielnictva zdolna spynić raspaŭsiud virusa.
Prakurorski načalnik aburyŭsia nieabhruntavanymi zatrymańniami biełarusaŭ8
Kamientary